PANNAKAGESSAT

Iti Israel, no maaramat mainaig iti maysa a dusa gapu iti panangsalungasing iti Linteg, kaipapananna ti pannakagessat iti ipapatay. Sigun iti sumagmamano a rabbi nga eskolar, tumukoy dayta iti pannakailaksid iti kongregasion ti Israel, nupay nagduduma ti kapanunotanda.

No sukimaten dagiti teksto ti Kasuratan a nangdakamat kadagiti basol a mapatawan iti kastoy a dusa, makita a tumukoy dayta iti dusa nga ipapatay, a mabalin nga impatungpal dagiti autoridad iti Israel wenno ti Dios a mismo. Mapatawan iti pannakagessat dagiti kadagsenan a krimen. Karaman kadagitoy ti di panagraem ken Jehova (ti Dios ken Ari ti Israel), idolatria, panagisakripisio iti ubing, espiritismo, panangtulaw kadagiti sagrado a banag, ken dagiti makarimon nga aramid a kas iti insesto, bestialidad, ken sodomia. Adda dagiti gundaway a ti dusa nga ipapatay ket espesipiko a nadakamat mainaig iti basol a maikari iti dusa a ‘pannakagessat.’​—Ex 31:14; Le 7:27; 18:6, 22, 23, 29; 20:3-6; 22:3, 4, 9; 23:28-30; Nu 4:15, 18, 20; 15:30, 31; kitaenyo met ti Ex 30:31-33, 38.

Ti nangaramid iti surat kadagiti Hebreo ket nabatad a sipapanunot idi iti sasao iti Numeros 15:30: “Ti kararua a mangaramid iti maysa a banag nga inggagara . . . masapul a magessat dayta a kararua iti tengnga dagiti kailianna,” idi kinunana: “Asinoman a tao a di nangikankano iti linteg ni Moises matay nga awan asi, iti pammaneknek ti dua wenno tallo.” (Heb 10:28) Inusar ni Jesus dayta a sao idi imbagana ti dusa dagiti simboliko a “kalding”: “Agturongto dagitoy iti agnanayon a pannakagessat [Gr., koʹla·sin; iti literal, “panangguped; panangarbas”], ngem dagiti nalinteg iti agnanayon a biag.” (Mt 25:46) Naipakita ditoy a ti biag ket maisupadi iti ipapatay.