DIABLO
Naipanagan ken Satanas daytoy a mangiladawan a nagan agsipud ta isu ti panguluen ken kangrunaan a manangpardaya ken ulbod a manangakusar ken Jehova, iti naimbag a saona, ken iti nasantuan a naganna. Ti Griego a di·aʹbo·los kaipapananna ti “manangpardaya.” (Idiligyo ti Lu 16:1, a pagparangan ti nainaig a berbo a di·a·balʹlo.)—Kitaenyo ti SATANAS.
Iti panaglabas ti sinigsiglo imparangarang ti Diablo nga isu ti kangrunaan a bumusbusor agpadpada iti Dios ken iti tao. Nakisupiat ken Miguel maipapan iti bagi ni Moises (Jud 9); impakitana nga addaan iti pannakabalin a mangsilo iti sabsabali (1Ti 3:7; 2Ti 2:26); nagaramat iti tattao a kas kadagiti ulbod a panguluen ti relihion, ni Judas Iscariote, ken ni Bar-Jesus kas annakna (Jn 8:44; 13:2; Ara 13:6, 10); inrurumen wenno indagelna dagiti tattao iti saan a kabaelan nga agasan dagiti mangngagas (Ara 10:38); dagiti nalinteg a tattao impaipisokna iti pagbaludan (Apo 2:10); ken nabaelanna pay nga iyeg ti di naintiempuan nga ipapatay (Heb 2:14). Ngarud, nabagbagaan dagiti Kristiano a saanda nga iwayaan daytoy a Manangpardaya iti Dios babaen ti panagtultuloyda a sipupungtot. (Efe 4:27) “Agtalinaedkayo a sipupuot, managbantaykayo koma,” ipakdaar ni Pedro. “Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna.”—1Pe 5:8.
Adda pay dadduma a paset iti orihinal a teksto iti Kristiano a Griego a Kasuratan a pagparangan ti sao a di·aʹbo·los ngem saan a tumukoy ken Satanas, ngarud ti sao umiso a naipatarus a “manangpardaya.” Kas pagarigan, iti panangtukoyna ken Judas, kinuna ni Jesus kadagiti 12, “Maysa kadakayo ti manangpardaya” (Jn 6:70); naballaagan ti babbai iti kongregasion a saanda nga agbalin a manangpardaya (1Ti 3:11; Tit 2:3); ti maysa kadagiti pammaneknek kadagiti “maudi nga aldaw” ket ‘dagiti tattao . . . manangparpardayanto.’—2Ti 3:1-5.
Ti linteg ni Jehova iti nasion ti Israel imparitna a pardayaenda ti maysa ken maysa. (Le 19:16) Ti kababagas ti intero a Biblia ket maibusor iti kasta a di umiso a panangaramat iti dila.—2Sm 19:27; Sal 15:3; 101:5; Pr 11:13; 20:19; 30:10; Jer 6:28; 9:4.