DRUSILA

Ti maikatlo ken inaudian nga anak a babai ni Herodes Agripa I, naipasngay idi agarup 38 K.P.; kabsat da Agripa II, Bernice, ken Mariamne III. Cypros ti nagan ti inana. Sakbay nga agtawen iti innem, nayurnos ti pannakayasawana ken prinsipe Epiphanes a taga Commagene, ngem saan a pulos naibanag dayta agsipud ta ti agbalin koma a nobio nagkedked a mangabrasa iti Judaismo. Ti ari ti Siria a ni Azizus a taga Emesa natungpalna ti kondision a panagpakugit, iti kasta naasawana ni Drusila iti edad a 14. Yantangay nagluksaw ni Drusila gapu iti kinaulpit ni Azizus ken nasair gapu iti panagimon ti saan unay a napintas a kabsatna a ni Bernice, nalaka a nakombinsir nga idiborsiona ni Azizus, a maikaniwas iti linteg dagiti Judio, ket nakiasawa ken Gobernador Felix idi agarup 54 K.P. Nalabit adda a siiimatang idi a ti balud a ni Pablo “agpalpalawag maipapan iti kinalinteg ken panagteppel ken iti pannakaukom nga umayto,” a dagita a topiko ket makariribuk unay ken Gobernador Felix. Kalpasan ti dua a tawen, idi inyawat ni Felix ti kinagobernador ken Festo, pinagtalinaedna a sibabalud ni Pablo tapno ‘magun-odna ti pabor dagiti Judio,’ nga ipagarup ti dadduma nga inaramidna dayta tapno ay-aywenna ti agtutubo nga asawana “a maysa a Judia.” (Ara 24:24-27) Ti anak ni Drusila iti pannakiasawana ken Felix ket sabali pay nga agnagan iti Agripa, a naipadamag a natay iti napigsa a panagbettak ti Bantay Vesuvius idi 79 K.P.