EN-GANNIM

[Ubbog (wenno, Burayok) Dagiti Minuyongan].

1. Maysa a siudad ti Juda iti Sefela, wenno patad a daga, a nadakamat iti isu met laeng a grupo a kas ti Adullam iti Josue 15:33-35. Ti ayanna ket mabalin nga adda iti agdama a Beit Jimal agarup 2.5 km (1.5 mi) iti abagatan ti Bet-semes, wenno iti maysa a disso iti asideg. Kunaen ti dadduma a ti Umm Jina, nga adda iti agarup 1 km (0.5 mi) iti laud ti Bet-semes, ti ayanna, ngem nalabit saan a dayta, gapu ta awan ti ubbog sadiay.

2. Maysa a siudad a masarakan iti tawid ti tribu ni Isacar. (Jos 19:17, 21) Mabalin a dayta ti siudad nga inawagan ni Josephus iti Ginae. Itatta, naikuna nga isu dayta ti Jenin, maysa nga ili iti makin-abagatan nga igid ti ginget a tanap ti Megiddo, wenno Jezrael, nga adda iti agarup 18 km (11 mi) iti abagatan a daya ti Megiddo ken 8 km (5 mi) iti amianan a daya ti Dotan, iti kangrunaan a dalan manipud Jerusalem nga agturong iti Nazaret. Ti Jenin ket napalikmutan kadagiti muyong ken minuyongan ken addaan iti burayok, a dagita a pakabigbigan tumunosda iti kaipapanan ti nagan nga En-gannim.

Ti En-gannim, agraman ti pagpaarabanna, ket naituding iti annak ni Gerson kas maysa a siudad dagiti Levita. (Jos 21:27-29) Iti 1 Cronicas 6:73, nabatad a naawagan dayta iti Anem.