PAMMASABLOG
Panangay-ayo babaen ti mangal-aliug a komendasion; panangpatiray-ok; di umiso, di napasnek, wenno nalabes a panangpadayaw. Gagangay a maaramid dayta tapno daydiay mapaspasablogan ket mapagustuan ti panagayatna iti bagina wenno ti panagpannakkelna; ngarud, makadadael dayta kenkuana. Mangpasablog ti maysa tapno makagun-od iti pabor wenno material a bambanag manipud iti sabali a tao, tapno maipariknana a rumbeng a subadan wenno padayawan daydiay paspasabloganna. Masansan a nairanta tapno masiluan ti sabali a tao. (Pr 29:5) Ti panangpasablog ket saanna nga iparparangarang ti sirib manipud ngato; nagtaud iti daytoy a lubong, a managimbubukodan, mangpatpataud iti panangidumduma, ken managinsisingpet. (San 3:17) Agpapada a di makaay-ayo iti Dios ti di kinanaimpusuan, kinaulbod, panangpatiray-ok wenno panangidaydayaw iti tattao, ken pananggundaway iti panaglablabes ti sabsabali.—2Co 1:12; Ga 1:10; Efe 4:25; Col 3:9; Apo 21:8.
Iti 1 Tesalonica 2:3-6, pinagdilig ti apostol ti nagdumaan ti Nakristianuan a dana ken ti panangpasablog, ket kunaenna: “Ta ti pammagbaga nga ipaaymi saan nga agtaud manipud iti biddut wenno manipud iti kinarugit wenno addaan allilaw, no di ket, kas iti panangpaneknek kadakami ti Dios kas maikari a pakaitalkan ti naimbag a damag, gapuna agsaokami, kas mangay-ayo, saan a kadagiti tattao, no di ket iti Dios, a mangsubok kadagiti pusomi. Iti kinapudnona, uray kaano saankami nga immay buyogen ti mamaspasablog a sasao, (kas iti pagaammoyo) wenno buyogen ti ulbod a pammarang maipaay iti kinaagum, ti Dios ti makasaksi! Saanmi met a sinapsapul ti dayag manipud kadagiti tattao, saan, uray manipud kadakayo wenno manipud iti sabsabali, nupay kabaelanmi koma ti agbalin a nangina a dadagsen kas apostol ni Kristo.”
Nupay kasla makagunggona ti pammasablog, ibatad ti Biblia a “daydiay mangtubngar iti maysa a tao makasarakto kalpasanna iti ad-adu a parabur ngem daydiay mamaspasablog babaen iti dilana.” (Pr 28:23) No mangpasablog ti maysa a tao tapno gundawayanna ti sabali, kasungani dayta ti ayat. Ti maysa a gumurgura mabalin a mangpasablog ngem inton agangay agtulid nga agsubli kenkuana ti panangallilawna a kas iti maysa a bato.—Pr 26:24-28.
Ti panangpasablog ket nabuyogan iti nalamuyot a sasao tapno maallilaw ti biktima. Ti sasao a “panangpasablog,” “nalamuyot a dila (bibig, wenno sasao)” (Sal 5:9; 12:2, 3; Da 11:32), “kinalamuyot” (Pr 7:21; Da 11:34, Rbi8 ftn), ken “dua ti rupana” (Eze 12:24, Rbi8 ftn) ket patarus ti Hebreo a sao a cha·laqʹ wenno dadduma pay a nainaig a sasao. Kadagiti amin a nadakamat a pagarigan iti Biblia, dakes ti motibo ti nalamuyot ti panagsasaona.
Ti maysa a pagarigan ti dakes a resulta iti panangawat iti pammasablog ken pammadayaw ti tattao ket isu ni Herodes Agripa I, a pinaspasablogan ken pinadpadayawan ti bunggoy a nangibaga kenkuana a kasla “timek ti maysa a dios” ti panagsaona. Agsipud ta inawatna ti pammasablog ken saanna nga inted ti dayag iti Dios, kinabil ti anghel ti Dios ket natay. (Ara 12:21-23) Iti sabali a bangir, sidadaras a linapdan da Bernabe ken Pablo ti maysa a bunggoy a mamagbalin kadakuada a didiosen. (Ara 14:11-15) Kasta met, idi a ti maysa a Judio nga agturay inawaganna ni Jesu-Kristo babaen iti mamaspasablog a titulo a “Naimbag a Mannursuro,” dagus nga inlinteg ni Jesus, a kunkunana: “Apay nga awagannak iti naimbag? Awan asinoman a naimbag, malaksid iti maysa, ti Dios.”—Lu 18:18, 19; idiligyo ti Job 32:21, 22.