PENNET ITI LAKKO (BEBESSANGAN)

Kadagiti uppat-sakana nga an-animal, dagitoy a pennet ket adda iti kamaudida. No pugsaten dagitoy, malugpi ti animal ket saanen a mabalin a pagtrabaho wenno pakigubat. Imparangarang da Simeon ken Levi nga annak ni Jacob ti kinamanangipapilit wenno saanda a kinanainkalintegan babaen ti pananglugpida kadagiti toro, nalabit idi agibalbalesda kadagiti Heveo ti Siquem. (Ge 49:5, 6) No makigubgubat dagiti Israelita, lugpienda ti kabkabalio dagiti kabusorda; iti maysa a pasamak, kasta ti espesipiko nga imbilin ni Jehova nga aramiden ni Josue. (Jos 11:6, 9; 2Sm 8:3, 4; 1Cr 18:3, 4) Daytoy idi ti kasimplean a pamuspusan tapno saan a maaramat dagiti kabalio iti gubat. Ket kalpasan ti kasta a pananglugpi kadagiti kabalio, di pagduaduaan a mapapatay dagitoy ket madadaelda agraman dagiti karuahe a pakigubat. Babaen ti saan a panangtagikua dagiti Israelita kadagiti kabalio ti kabkabusorda ken ti saanda met a panangusar kadagita iti gubat, masaluadanda manipud iti silo ti panagpannuray kadagiti kabalio maipaay iti pannalaknib imbes nga agpannurayda ken Jehova.​—Idiligyo ti De 17:16; Isa 31:1, 3.