HIN

Likido a sukat (Ex 30:24; Nu 28:14; Eze 45:24; 46:5, 7, 11); naaramat met mainaig iti pagkargaan a maipaay a pangrukod iti maysa a hin. (Le 19:36) Sigun iti Judio a historiador a ni Josephus, ti maysa a hin katupag ti dua a chous ti Atenas; ti maysa a bat katupag ti 72 a sextario. (Jewish Antiquities, III, 197 [viii, 3]; VIII, 57 [ii, 9]) Yantangay ipasimudaag ti dadduma pay a gubuayan a ti dua a chous ti Atenas aggatad iti 12 a sextario, ti hin mabalin a pattapattaen nga apagkanem ti bat a sukat wenno agarup 3.67 L (7.75 pt).

Dakamaten met ti Kasuratan dagiti kapaset ti maysa a hin: kagudua, kakatlo, kakapat, ken apagkanem; daytoy naud-udi ket inaldaw a rasion a danum a naipalubos ken Ezequiel idi iladladawanna ti nakaro a kasasaad a dumteng iti Jerusalem iti sidong ti pannakalakub.​—Ex 29:40; Le 23:13; Nu 15:4-7, 9, 10; 28:5, 7; Eze 4:11; 46:14.