LABDANUM

Nalukneng, nangisit wenno kayumanggi a tutot nga agruar manipud bulbulong ken sangsanga ti nadumaduma a kita ti Cistus, wenno rockrose. Napait ti raman ti tutot ngem nabanglo. Maar-aramat kadagiti bangbanglo, ken adda idi tiempo a kasta unay ti pannakaaramatna iti medisina. Maipapan iti daytoy a sangkap, insurat ti nagkauna a Griego a historiador a ni Herodotus (III, 112): “Maala dayta kadagiti barbas dagiti kalakian a kalding, a masarakan a nakadekket a kasla tutot, a naggapu kadagiti babassit a kayo a nagarabanda. Maar-aramat iti adu a kita ti unguento [sapsapo], ken dayta ti kangrunaan a puoran dagiti Arabo kas insienso.”​—Patarus ni G. Rawlinson.

Ti Hebreo a sao a nekhoʼthʹ tukoyenna daytoy a banag nga awit-awit ti sangkakuyogan a managbiahe nga Ismaelita a nakailakuan ni Jose ken maysa kadagiti nasayaat a produkto nga imbaga ni Jacob kadagiti annakna nga alaenda kas sagut iti daydiay agturay idi idiay Egipto. (Ge 37:25; 43:11) Ti nekhoʼthʹ nagduduma ti pannakaipatarusna kas “especia” (KJ), “tutot” (AT, RS), “tragacanto” (Da), “resina” (Mo), ken, kas panangdepinar da Koehler ken Baumgartner, “labdanum” (NW).​—Lexicon in Veteris Testamenti Libros, Leiden, 1958, p. 615.