PANGNIBEL, ALIKAMEN A

Maysa a gamigam a naaramat tapno masigurado a patas ti rabaw ti maysa a banag wenno umiso dagiti angguloda mainaig iti parsed a parteng. Ti “alikamen a pangnibel” (Heb., mish·qeʹleth wenno mish·qoʹleth) ket inaramat dagiti allawagi, kantero iti bato, ken dadduma pay a nasigo a trabahador kadagidi kadaanan a tiempo tapno masigurado a patas dagiti ibangonda a pader ken nadumaduma a patakder, idinto ta naaramat met ti tinnag tapno masigurado a nalinteg ti panagtakder dagitoy. Agparang a nagaramat dagiti Egipcio a kantero iti pangnibel a kasla letra “A” ti sukogna nga addaan iti ababa a parsed a parteng nga agbibitin manipud timmirad a murdong. Nabatad a no ti agbitbitin a parteng bumatog iti sentro a marka ti paballanganna, impasimudaag daytoy a ti rabaw a nakaikabilan dayta ket patas. Nupay kasta, saan a mangipaay ti Kasuratan iti panangiladawan kadagiti alikamen a pangnibel ken tukoyenna daytoy a gamigam kadagiti piguratibo laeng a pamay-an.

Ti alikamen a pangnibel mabalin nga aramaten iti siuumiso a panangibangon iti maysa a patakder wenno pangtingiting iti pannakaikarina a mataginayon. Impadto ni Jehova nga usarenna iti nasungit a Jerusalem “ti pagrukod a parteng a nausar iti Samaria ken kasta met ti alikamen a pangnibel a nausar iti balay ni Acab.” Rinukod ti Dios ket nasarakanna a ti Samaria ken ti balay ni Ari Acab dakes wenno rinuker iti moral, a nagbanag iti pannakadadaelda. Kasta met, ti Dios ukomenna ti Jerusalem ken dagiti agtuturay iti dayta, nga ibutaktakna ti kinadangkesda ken ipagtengna ti pannakadadael dayta a siudad. Dagitoy a pasamak aktual a naaramid idi 607 K.K.P. (2Ar 21:10-13; 10:11) Babaen ken Isaias napakaammuan dagiti nadumaduma a nadangkes a pangas ken agtuturay dagiti umili idiay Jerusalem maipapan iti um-umay a pannakadidigrada ken iti deklarasion ni Jehova: “Ti kinahustisia pagbalinekto a pagrukod a parteng ket ti kinalinteg pagbalinek nga alikamen a pangnibel.” Dagiti pagalagadan iti pudno a kinahustisia ken pudpudno a kinalinteg ipalgakda no asino a pudpudno dagiti adipen ti Dios ken no asino dagiti saan, nga agbanag iti pannakaitalimeng wenno pannakadadael.​—Isa 28:14-19.