MACTES

[Alsong].

Nalabit maysa a paset ti Jerusalem iti asideg ti Ruangan ti Ikan ken ti maikadua a purok. Iti pannakadidigra ti Juda, naipadto nga aganug-og dagiti agnanaed iti Mactes, yantangay agpatingga dagiti panagkomersio sadiay.​—Sof 1:1, 2, 10, 11.

Ti Hebreo a sao a makh·teshʹ ket tumukoy iti “alsong” (Pr 27:22) wenno “maysa a sinan-alsong a likkukong” (Uk 15:19), isu a ti sumagmamano a patarus usarenda ti “Alsong” imbes a “Mactes” kas personal a nagan. (AT, JB, RS) Kunaen ti Targum a ti Mactes isu ti Ginget Kidron, ti nauneg a baw-ang iti igid ti makindaya a pader ti Jerusalem. Ngem daytoy a ginget ket saan a masarakan iti asideg ti nalalaud a “Ruangan ti Ikan” ken ti “maikadua a purok.” Maigapu itoy, kaaduanna a maipagarup a ti Mactes tumukoy iti maysa a paset ti Makintengnga a Ginget (Ginget Tyropoeon), nalabit ti makinngato a paset dayta.