MESULLAM

[nagtaud iti sao a kaipapananna ti “makikappia; subadan; supapakan”].

1. Maysa nga ulo ti pamilia iti tribu ni Benjamin a nagnaed idiay Jerusalem; anak ni Elpaal.​—1Cr 8:1, 17, 18, 28.

2. Maysa a Gadita a nagnaed idiay Basan. Nailanad kas anak ni Abihail idi naipasalista dagiti umili mayannurot iti kapuonanda bayat dagiti panagturay da Jotam ken Jeroboam II (nabatad a dua a nagduma a pannakaipasalista agsipud ta saan a nagsinnaknib dagiti panagturay dagitoy nga ar-ari).​—1Cr 5:11, 13, 14, 16, 17.

3. Apong wenno inapo ni Safan a sekretario ni Ari Josias.​—2Ar 22:3.

4. Ama wenno inapo ti nangato a padi a ni Hilkias idi tiempo ti panagturay ni Ari Josias. (1Cr 9:11; Ne 11:11) Nalabit nagakem a mismo ni Mesullam kas nangato a padi. Dadduma kadagiti kaputotanna ti nagnaed idiay Jerusalem kalpasan ti pannakaidestiero idiay Babilonia. Nalawag a naawagan Sallum iti 1 Cronicas 6:12, 13 ken Esdras 7:2.​—Kitaenyo ti SALLUM Num. 7.

5. Maysa a Cohatita a Levita, maysa kadagiti sumagmamano a nangidaulo iti pannakatarimaan ti templo nga imbilin ni Ari Josias.​—2Cr 34:1, 8, 12.

6. Maysa a padi a dagiti kaputotanna (saan a nakurkurang ngem tallo a kaputotan kalpasan kenkuana) ket nagnaed idiay Jerusalem kalpasan ti pannakaidestiero idiay Babilonia.​—1Cr 9:2, 3, 10, 12.

7. Maysa a Benjamita; ti anakna a ni Sallu ket maysa nga ulo ti pamilia idiay Jerusalem kalpasan ti pannakaidestiero idiay Babilonia. (1Cr 9:3, 7, 9) Maipagarup nga isu met laeng ti Mesullam a nailanad iti Nehemias 11:7.

8. Maysa a Benjamita nga ulo ti pamilia a nagnaed a mismo idiay Jerusalem kalpasan ti pannakaidestiero.​—1Cr 9:3, 7-9.

9. Ti umuna a nailista nga anak ni Gobernador Zorobabel; kaputotan ni Ari David.​—1Cr 3:1, 19.

10. Pannakaulo ti napadian a sangakabbalayan ni Esdras iti dasig ti amana idi kaaldawan ni Joiaquim a simmuno ken Jesua. (Ne 12:12, 13) Posible nga isu met laeng ti Num. 18 wenno 19.

11. Pannakaulo ti napadian a sangakabbalayan ni Ginneton iti dasig ti amana bayat ti panagtakem ni Joiaquim. (Ne 12:12, 16) Posible nga isu met laeng ti Num. 18 wenno 19.

12. Maysa nga agay-aywan iti ruangan idi kaaldawan da Joiaquim, Esdras, ken Nehemias.​—Ne 12:25, 26.

13. Daydiay pannakaulo a karaman kadagiti umili a naummong idiay karayan Ahava maipaay iti panagdaliasat nga agturong idiay Jerusalem a kadua ni Esdras idi 468 K.K.P. Maysa ni Mesullam kadagiti sumagmamano a dinutokan ni Esdras a tumulong a mangummong iti adu a Levita ken Netineo a makipagbaniaga met. (Esd 8:15-20) Posible nga isu met laeng ti Num. 16, 17, 20, wenno 21.

14. Levita a nalabit nangsupiat iti pammagbaga a papanawenda ti ganggannaet nga assawa a babbai a nasarakan ni Esdras iti nagtetengngaan dagiti Israelita idi nagsubli idiay Jerusalem. Nupay kasta, ti teksto mabalin a tarusan a kaipapananna nga isu simmupiat laeng iti pamay-an a pannakaipatungpal dayta.​—Esd 10:10-15, Rbi8 ftn.

15. Maysa kadagiti “annak” wenno kapkaputotan ni Bani a nangipangag iti pammagbaga ni Esdras babaen ti panamagtalawda iti ganggannaet nga assawa a babbai ken iti annakda.​—Esd 10:29, 44.

16. Anak ni Berekias a nangtarimaan iti dua a benneg ti pader ti Jerusalem iti panangiwanwan ni Gobernador Nehemias. (Ne 3:4, 30) Ti anakna a babai inyasawana ken Jehohanan nga anak ni Tobias nga Ammonita, a daytoy a panagasawa ti nakaigapuan ti pannakabingbingay dagiti nagsubli nga Israelita.​—Ne 6:17-19; 4:3; kitaenyo ti Num. 13.

17. Maysa kadagiti dua a nangtarimaan iti Ruangan ti Daan a Siudad iti proyekto ni Nehemias a pannakatarimaan ti pader; anak ni Besodias.​—Ne 3:6; kitaenyo ti Num. 13.

18. Maysa kadagidiay nagtakder iti kannigid ni Esdras idi binasana ti Linteg kadagiti naummong a bunggoy iti maikapito a bulan ti 455 K.K.P. Nalabit maysa a padi ni Mesullam.​—Ne 8:2, 4; kitaenyo ti Num. 10 ken 11.

19. Maysa a padi (wenno inapo ti maysa a padi) a nangpatalged iti tulag ti kinamatalek nga insingasing dagiti Levita.​—Ne 9:5, 38; 10:1, 7, 8; kitaenyo ti Num. 10 ken 11.

20. Maysa a panguluen dagiti umili a ti kaputotanna, no saan nga isu a mismo, pinatalgedanna met ti isu met laeng a kasuratan.​—Ne 10:1, 14, 20; kitaenyo ti Num. 13.

21. Karaman iti martsa ti inagurasion nga inyurnos ni Nehemias kalpasan a nairingpas ti pader ti Jerusalem.​—Ne 12:32, 33; kitaenyo ti Num. 13.