MUTH-LABBEN

Termino a nairaman iti superskripsion ti maysa kadagiti salmo ni David (Sal 9), a nabayagen a maikunkuna a kaipapananna ti “[mainaig] iti ipapatay ti anak.” Sigun iti sumagmamano a komentarista, dayta ket pagilasinan ti mangiwanwanwan iti musika maipapan iti nagan wenno nalabit iti panglukat a sasao ti maysa a pagaammo a kanta a nagpaay kas tonada iti panangkanta iti daytoy a salmo. Indatag ti Targum ti maysa a posible a kaipapanan ti sao, nga iti dayta mabasa iti paulo ti Salmo 9: “Iti ipapatay ti lalaki a rimmuar kadagiti pakarso,” a mangipasimudaag iti maysa a mannakigubat. Ti nalawag a matuktukoy ditoy isu ni Goliat, ti maingel a lalaki manipud kampo dagiti Filisteo nga inabak ni David iti gubat iti nagbaetan ti pakarso dagiti Israelita ken ti pakarso dagiti Filisteo.​—1Sm 17:45-51.