OFNI

Maysa a siudad iti teritoria ti Benjamin (Jos 18:21, 24) a gagangay a maikunkuna nga isu ti Gophna a dinakamat ni Josephus (The Jewish War, III, 55 [iii, 5]) ken maibilbilang kas ti agdama-aldaw a Jifna. Daytoy a disso ket agarup 5 km (3 mi) iti amianan nga amianan-a-laud ti Bethel ket ngarud agparang nga adda iti amianan ti teritoria ti Benjamin. (Jos 18:11-13) Tapno agbalin nga umiso ti nadakamaten, masapul nga ipapan a ti Ofni ket maysa a naipasngat a siudad dagiti Benjamita iti teritoria ti Efraim wenno masapul a ti beddeng ti Benjamin naglayon iti amianan iti asideg ti Bethel tapno mairaman daytoy naisingasing a disso ti Ofni.