AGILISLISTA

Mapagpiaran unay nga opisial iti naarian a palasio ti Israel. Ti titulo naipatarus manipud iti maysa a porma ti Hebreo a sao a za·kharʹ (lagipen) ken literal a kaipapananna ti “manangipalagip.” (2Sm 8:16, Rbi8 ftn) Saan a nadeskribir iti Biblia dagiti annongenna, ngem agparang nga isu ti opisial a mannurat iti salaysay ti pagarian, a mangipaay iti impormasion iti ari maipapan kadagiti panagrang-ay iti pagturayan ken kasta met a mangipalagip kenkuana kadagiti napateg a banag nga asikasuenna, a mangited iti singasing maipapan kadagita.

No dadduma, ti agilislista imbagianna ti ari kadagiti napateg a banag mainaig iti nasion. Ni Joa nga anak ni Asaf ket maysa kadagiti opisial ni Ari Ezekias a napan nakisao ken Asirio a Rabsaque idi a dayta a tao pangpangtaanna ti Jerusalem. (2Ar 18:18, 37) Ti sabali pay nga agilislista, ni Joa nga anak ni Joacaz, nagannong mainaig iti panangtarimaan iti templo. (2Cr 34:8) Nainaganan met kadagiti palasio da David ken Solomon ti maysa nga agilislista.​—2Sm 8:16; 20:24; 1Ar 4:3; kitaenyo ti MANAGILISTA ITI SIUDAD.