TIMON, II

Napateg a paset ti aparato a pangiturong iti barko. Nagduduma ti estilo ken bilang ti timon dagiti nagkauna a paglayag a sasakayan. Adda dagidiay maymaysa ti pangiturong a gaudda. Ngem kaaduanna a dagiti Griego ken Romano a barko ket addaan iti dua a pangiturong a gaud iti kutit, a mabalin nga aramaten ti tunggal maysa babaen ti pannakaiserrekda iti usokan ti gaud iti sikigan. No nakaangkla ti sasakayan, maisang-at dagiti pangtimonna a gaud ken magalutan wenno maparautan dagita.

Dagiti “pangtimon a gaud” (“pangiturong a gaud,” NE) ti naaramat a pangiturong iti barko a nagluganan ni Pablo iti panagturongna idiay Roma, ngem narba dayta idiay Malta. Napugsat dagiti angkla, ket sakbay a naingato ti makinsango a layag, nawarwar ti galgalut, iti kasta nawaswas dagiti pangtimon a gaud nga aramaten dagiti lumalayag tapno maisangladda ti barko.​—Ara 27:40.

Ipakita ni Santiago (3:4, 5) ti kinabileg ti dila a mangkontrol iti turongen ti intero a bagi ti maysa a tao babaen ti panangidiligna iti dayta iti pamassiten a timon (“pangtimon a gaud,” Int) ti maysa a dakkel a barko.