MANANGISALAKAN
Mangigaga wenno mangispal manipud peggad wenno pannakadadael. Ni Jehova ket naikuna nga isu ti kangrunaan a Manangisalakan, ti kakaisuna a Gubuayan ti pannakaispal. (Isa 43:11; 45:21) Nagserserbi ni Jehova kas Manangisalakan ken Manangispal iti Israel. (Sal 106:8, 10, 21; Isa 43:3; 45:15; Jer 14:8) Saan laeng a ti nasion ti insalakanna no di ket uray pay dagiti indibidual a nagserbi kenkuana. (2Sm 22:1-3) Masansan a mangisalakan idi babaen kadagiti lallaki a dinutokanna kas manangisalakan. (Ne 9:27) Idi panawen dagiti Uk-ukom, dagitoy a naisangsangayan a manangisalakan ket pinili ti Dios ken impaayanna ida iti bileg a mangispal iti Israel manipud panangirurumen dagiti ganggannaet. (Uk 2:16; 3:9, 15) Bayat a sibibiag ti ukom, pagtalinaedenna ti Israel iti umiso a dana, iti kasta nawayawayaanda iti panangriribuk dagiti kabusorda. (Uk 2:18) Idi adda ni Jesus ditoy daga, ni Jehova ti Manangisalakanna, a timmulong ken nangpabileg kenkuana tapno mataginayonna ti kinatarnawna iti laksid dagiti narigat a pakasuotanna.—Heb 5:7; Sal 28:8.
Maibuyog iti akem ni Jehova kas Manangisalakan, isu ket “Manangsaka” met. (Isa 49:26; 60:16) Kadagidi naglabas, sinubbotna ti ilina nga Israel manipud pannakakautibo. Tapno maispal dagiti Kristiano manipud panangadipen ti basol, sinakana ida babaen iti Anakna a ni Jesu-Kristo (1Jn 4:14), ti impaay ni Jehova a pakaisalakanan, ket gapu iti dayta intan-okna ni Jesus kas “Kangrunaan nga Ahente ken Manangisalakan.” (Ara 5:31) Umiso laeng ngarud a maawagan ni Jesu-Kristo iti “Manangisalakantayo,” nupay mangisalakan kas instrumento laeng ni Jehova. (Tit 1:4; 2Pe 1:11) Ti nagan a Jesus, a naipanagan iti Anak ti Dios babaen ti bilin ti anghel, ket kaipapananna ti “Ni Jehova ket Salakan,” ta, kinuna ti anghel, “isalakannanto ti ilina kadagiti basolda.” (Mt 1:21; Lu 1:31) Ipasimudaag daytoy a nagan a ni Jehova ti Gubuayan ti pannakaisalakan, a naibanag babaen ken Jesus. Gapu itoy, ti Ama ken ti Anak ket agpadpada a nadakamat iti dayta mainaig iti pannakaisalakan.—Tit 2:11-13; 3:4-6.
Impaay ni Jehova ti pannakaisalakan iti “amin a kita ti tattao” babaen ken Jesu-Kristo. (1Ti 4:10) Isalakanna ida manipud basol ken ipapatay (Ro 8:2), manipud Babilonia a Dakkel (Apo 18:2, 4), manipud iti daytoy lubong nga iturturayan ni Satanas (Jn 17:16; Col 1:13), ken manipud iti pannakadadael ken agnanayon nga ipapatay (Apo 7:14-17; 21:3, 4). Kas naipakita iti Apocalipsis 7:9, 10, bigbigbigen ti “dakkel a bunggoy” a ti pannakaisalakanda ket utangda iti Dios ken iti Kordero.
Ti pangsubbot a sakripisio ti pakaibatayan ti pannakaisalakan, ken kas Ari ken agnanayon a Nangato a Padi, addaan ni Kristo Jesus iti autoridad ken pannakabalin a ‘mangisalakan a naan-anay kadagidiay umadani iti Dios baeten kenkuana.’ (Heb 7:23-25; Apo 19:16) Isu ti “manangisalakan iti daytoy a bagi,” ti kongregasion dagiti napulotan a pasurotna, ken amin met dagidiay maaddaan iti pammati kenkuana.—Efe 5:23; 1Jn 4:14; Jn 3:16, 17.