TINTERO TI SEKRETARIO

Iti Ezequiel 9:2, 3, 11, ti lalaki a sikakawes iti lienso a makinrebbeng iti panangmarka iti muging dagiti indibidual ket nadeskribir nga addaan iti “tintero ti sekretario kadagiti padingpadingna,” a nabatad a naikabil dayta iti barikes a naipalikmut iti siketna. Daytoy a tintero ti sekretario ket mabalin nga umasping idi kadagidiay naaramat iti maysa a tiempo iti nagkauna nga Egipto. Ti ‘alikamen a pagsurat’ ket atiddog ken akikid a pagkargaan a naaramid iti kayo ken addaan iti benneg wenno silsiled a pakaikabilan dagiti runo a pluma. Iti parupana nga asideg ti tuktokna, addaan di kumurang a maysa a likkaong maipaay iti bassit a katukel ti namaga a tinta. No agsurat ti eskriba, ideppelna ti nabasa nga ungto ti plumana iti tinta. Ipakita dagiti kitikit a nagaramat dagiti Sirio nga eskriba iti umasping nga ‘alikamen a pagsurat.’