SELEUCIA

Maysa a nasarikedkedan nga ili iti igid ti Baybay Mediteraneo. Nagpaay a sasangladan ti Antioquia ti Siria ken masarakan iti agarup 20 km (12 mi) iti abagatan a laud dayta a siudad. Adda dalan a namagkamang kadagitoy dua a lugar. Kasta met a ti Karayan Orontes (mabalin a pagdaliasatan ti barko) a lumabas iti Antioquia ket agayus iti Baybay Mediteraneo iti abagatanen laeng ti Seleucia. Naglayag ni Pablo a kaduana ni Bernabe manipud Seleucia idi rugi ti umuna a panagbaniagana kas misionero, idi agarup 47 K.P. (Ara 13:4) Nupay kalpasan daytoy ket saanen a nadakamat ti Seleucia iti salaysay ti Aramid, mabalin nga adda nakainaiganna iti dadduma pay a pasamak a naisalaysay iti dayta. (Ara 14:26; 15:30-41) Tapno maiduma daytoy a siudad iti dadduma pay a lugar a kasta met laeng ti naganda idiay kadaanan a Makintengnga a Daya, maawagan dayta no dadduma iti Seleucia Pieria. Amiananen laeng dayta ti agdama a Süveydiye, wenno Samandag, idiay Turkia. Gapu iti lan-ak manipud Orontes, nagbalin nga aluguog laengen ti sasangladan ti nagkauna a Seleucia.