KABSAT A BABAI

Iti Kasuratan, ti termino agaplikar iti babai a kabsat iti ama ken ina. Kasta met nga agaplikar iti babai a kabsat babaen iti maysa a nagannak, mabalin a maymaysa ti ama ngem nagduduma ti inna (Ge 34:1, 27; 1Cr 3:1-9), wenno maymaysa ti ina ngem nagduduma ti amma, kas iti kasasaad ti kakabsat a babbai ni Jesus.​—Mt 13:55, 56; Mr 6:3.

Nabatad a ti annak a lallaki ni Adan inasawada ti kakabsatda a babbai, yantangay ti intero a sangatauan nagtaud kada Adan ken Eva. (Ge 3:20; 5:4) Ti asawa ni Adan a ni Eva, kas ‘tulang dagiti tulangna ken lasag ti lasagna,’ ket nasingsinged ti pannakainaigna ngem iti maysa a kabsat a babai. (Ge 2:22-24) Saan idi a malais ti pannakiasawa iti kabsat a babai wenno iti kabsat a babai iti ama. Ipadamag ti salaysay a nasurok a 2,000 a tawen kalpasanna, inasawa ni Abraham ti kabsatna-iti-ama a ni Sara. (Ge 20:2, 12) Nupay kasta, agarup 430 a tawen kalpasanna, impawil ti Mosaiko a Linteg dagiti kasta a panagtipon ket naibilang kas insesto. (Le 18:9, 11; 20:17) Gapu iti panagrakaya ti natauan a puli manipud orihinal a kinaperpekto ni Adan, awan duadua a nagbalin a makapadakes ti panagasawa dagiti tattao a nasinged nga agkabagian.

Iti nalawlawa a kaipapananna, ti ‘kabsat a babai’ tumukoy met kadagiti kailian a babbai iti maysa a nasion. (Nu 25:17, 18) Dagiti nasion wenno siudad nga addaan iti nasinged a relasion, wenno nagaramid iti agpadpada a moral nga ar-aramid nayaspingda iti agkakabsat a babbai.​—Jer 3:7-10; Eze 16:46, 48, 49, 55; 23:32, 33.

Ti Hebreo a sao maipaay iti kabsat a babai (ʼa·chohthʹ) ket naipatarus nga “iti sabali,” no mailadladawan ti agkaasmang a bambanag iti tabernakulo ken kadagiti sirmata ni Ezequiel.​—Ex 26:3, 5, 6, 17; Eze 1:9, 23; 3:13.

Iti Kongregasion Kristiano. Insuro ni Jesus a maipangpangruna dagiti naespirituan a relasion imbes a dagiti nainlasagan a relasion. Dagidiay babbai a nangaramid iti pagayatan ni Amana ket ‘kakabsat a babbai’ a naibilang a napatpateg ngem kadagiti kakabagian laeng. (Mt 12:50; Mr 3:34, 35) Daydiay situtulok a mangguped kadagiti naindagaan a singgalut maigapu iti Pagarian, no kasapulan, ket maaddaanto iti “maminsangagasut” a “kakabsat a babbai” ken iti kamkameng ti ‘pamilia’ ita, agraman “agnanayon a biag” iti masanguanan. (Mt 19:29; Mr 10:29, 30; Lu 14:26) Dagiti babbai iti uneg ti kongregasion Kristiano ket naawagan iti kakabsat a babbai, iti naespirituan a kaipapanan.​—Ro 16:1; 1Co 7:15; 9:5; San 2:15.

Piguratibo nga Usar. Imparegta ti masirib a mannurat a ni Solomon ti panagbalin a nasinged iti “sirib” idi impaganetgetna ti kinapateg dagiti bilin ni Jehova. “Sawem iti sirib: ‘Sika ti kabsatko a babai’; ket ti met laeng pannakaawat awagam koma iti ‘Kabagian a babai.’”​—Pr 7:4.