DAPPAT A BATO

Napalanas a disso idiay Jerusalem a sadiay a ti Romano a Gobernador Poncio Pilato nagtugaw iti tugaw iti panangukom idi a ni Jesu-Kristo adda iti saklangna maipaay iti pannakausig. (Jn 19:13) Ti disso naawagan, iti Hebreo, “Gabbatha,” sao a di masigurado ti nagtaudanna ken mabalin a kaipapananna ti “turod,” “kangatuan,” wenno “nalayang a lugar.” Ti Griego a nagan maipaay iti dayta, Li·thoʹstro·ton (Dappat a Bato), mabalin nga ipatuldona ti maysa a naukritan a dappat, nga addaan pannakadisenio.

“Ti Dappat a Bato” a dimmatagan ni Jesus iti sanguanan ni Pilato adda pannakainaigna iti “palasio ti gobernador.” (Jn 19:1-13) Mabalin a maysa dayta a nalayang a lugar iti sango ti palasio ni Herodes a Dakkel; ti sumagmamano nga eskolar anamonganda nga isu dayta ti maysa a disso iti asideg wenno iti maysa a sentro a palasio iti uneg ti Torre ti Antonia, nga adda iti amianan a laud dagiti paraangan ti templo. Ngem saan pay nga ammo ti eksakto nga ayan Ti Dappat a Bato.​—Kitaenyo ti ANTONIA, TORRE TI; PALASIO TI GOBERNADOR.