SIRTE

[nagtaud iti sao a kaipapananna ti “uloden”].

Ti Griego a nagan ti dua a gulpo a masarakan iti las-ud ti dakkel a kimmaut a paset ti kosta ti makin-amianan nga Africa. Ti makinlaud a gulpo (nagbaetan ti Tunis ken Tripoli) ket naawagan Sirte Menor (Gulpo ti Gabès ita). Iti dayaen laeng dayta, adda ti Sirte Mayor, ti agdama a Gulpo ti Sidra. Dagiti nagkauna a lumalayag kabutengda idi dagitoy dua a gulpo gapu kadagiti nakaam-amak a kurruoy, nga umalis-alis ti ayanda gapu iti panagatab ken panagugot ti danum. Maipapan kadagiti barko a simmanglad kadagiti baknad, impadamag ni Strabo a maysa a geograpo iti umuna a siglo K.P.: “Manmano a sitatalged a makapanaw ditoy ti maysa a barangay.”​—Geography, 17, III, 20.

Idi maip-ipan ni apostol Pablo idiay Roma kas balud, nasabet ti barko a naglugananna ti kasaor nga angin iti abagatan ti Creta. Ngarud, nagamak dagiti tripulante a ti barko maisadsad idiay “Sirte,” nabatad a dagiti kurruoy ti Gulpo ti Sidra.​—Ara 27:14-17.