TARE

[mabalin a manipud Babiloniko a sao, kaipapananna ti “Atap a Kalding”].

1. Ama ni Abraham; ti maikawalo a kaputotan manipud ken Sem. (Lu 3:34; Ge 11:10-24; 1Cr 1:24-26) Nagbalin ni Tare nga inapo ti adu a tribu babaen iti annakna a da Abraham, Nacor, ken Haran. (Ge 11:27; 22:20-24; 25:1-4, 13-15; 1Cr 1:28-42; 2:1, 2) Nangrugi a maaddaan ni Tare iti annak idi agtawen iti 70. Nupay ni Abraham ti immuna a nailanad, mabalin a gapu ta isu ti kalatakan kadagiti annak ni Tare, saan nga isu ti inauna. Idi natay ni Tare iti edad a 205, agtawen laeng ni Abraham iti 75, isu a mabalin a 130 ti tawen ni Tare idi mayanak ni Abraham. (Ge 11:26, 32; 12:4) Agkabsat da Sara ken Abraham iti ama, a nalabit annak ida ni Tare iti nagduma nga asawa. (Ge 20:12) Mabalin a ti inauna nga anak ni Tare ket isu ni Haran, nga umdasen ti tawen ti anakna a babai tapno makiasawa ken Nacor a sabali pay nga anak ni Tare.​—Ge 11:29.

Nagnaed ni Tare idiay Ur nga ayan dagiti Caldeo, ket sadiay a dimmakkel ti pamiliana. (Ge 11:28) Sigun iti Josue 24:2, adda panawen a nagdaydayaw ni Tare iti sabali a didios malaksid ken Jehova, nalabit iti dios-bulan a ni Sin, ti pagay-ayat a didiosen ti Ur. Nupay kasta, idi imbaga ni Jehova a panawan ni Abraham ti daga ti Ur, ni Tare kas ulo ti pamilia kimmuyog a napan idiay Haran a sadiay ti nagnaedanda agingga iti ipapatayna idi agarup 1943 K.K.P.​—Ge 11:31, 32; Ara 7:2-4.

2. Maysa kadagiti nagkampuan ti Israel bayat ti panagallaallada idiay let-ang; saan nga ammo ti ayanna.​—Nu 33:27, 28.