TRANSPORTASION

Maysa a pamay-an a panangibiahe wenno panangitulod manipud maysa a lugar nga agturong iti sabali a lugar. Idi un-unana, nagduduma dagiti kita ti lugan ken pamay-an a pagdaliasat, agpannuray iti kasasaad dagiti agdaldaliasat ken iti papananda wenno kadagiti lugar a pakaipanan dagiti kargamento.

Gapu ta kabaelan ti kamelio ti agbiag uray no dagiti laeng kadawyan a mulmula iti desierto ti kankanenna ken uray di uminum iti danum iti napaut a tiempo, maikanatad nga usaren daytoy nga animal a pagdaliasat kadagiti natikag a rehion. Dagiti kamelio ket naaramat kas pagsakayan dagiti tattao ken pagbunag iti tagilako a maipan iti sabali a lugar. (Ge 37:25-28; Uk 6:3-5; 7:12; 1Ar 10:2) Ti dadduma pay nga animal a naaramat kas pagsakayan wenno kas animal a pagtrabaho ket: ti asno (Jos 15:18; Uk 5:10; 10:4; 12:14; 1Sm 25:42; Isa 30:6), mulo (1Ar 1:33), ken kabalio (1Ar 4:26; Ara 23:23, 24, 31-33). Nasaknap idi ti pannakausar dagiti barko. (2Cr 9:21; Eze 27:9; Jon 1:3; Ara 20:13-15; 27:1-44) Naaramat met dagiti kareson a pagibiahe iti al-alikamen ken tattao. (Ge 46:5; Nu 7:1-9) Dagiti karuahe wenno kamilia, a no dadduma aduan iti arkos, ti kankanayon a nausar a pagluganan dagiti ari wenno tattao a nangato ti saadda. (2Ar 10:15; Sol 3:6-10; Ara 8:26-31) Kadawyan met a magmagna laeng dagiti ordinario a tattao.​—Lu 24:13-15; kitaenyo ti BARKO; DALAN, KANGRUNAAN A KALSADA; KAMILIA; KARESON; KARUAHE; KOMUNIKASION.