PANAGTAEP

Ti maudi nga addang tapno maisina dagiti binukel, a kas iti sebada ken trigo, manipud iti taep ken garami. No naisinan ti binukel manipud iti taep kalpasan ti pannakairikna, ket ti garami naputputeden iti babassit, maitaepen dagitoy babaen ti panangipallangatok a maisuba iti angin babaen iti suplad wenno tinidor a pagtaep. (Isa 30:24) Ti taep ket maibuyog iti angin, a napigpigsa no iti rabii, idinto ta itayabna met nga ipaigid dagiti garami, ket dagiti binukel agtinnagda a mismo iti pagirikan. (Ru 3:2; LADAWAN, Tomo 2, p. 953) Kalpasan a mayakayak ti binukel tapno maikkat dagiti bisil ken ti dadduma pay a rugit, mabalinen a magiling wenno maipempen.​—Am 9:9; Lu 22:31.

Piguratibo nga Usar. Masansan a maar-aramat a piguratibo ti ‘panagtaep.’ Kas pagarigan, pinanggep ni Jehova ti mangibaon kadagiti “managtaep” maibusor iti Babilonia ken kadagiti agnanaed kenkuana tapno itaepda ti Babilonia. (Jer 51:1, 2) Dagiti “managtaep” ket dagiti Medo ken dagiti Persiano nga indauluan ni Ciro. Arigna impallangatokda ti Babilonia ken dagiti agnanaed kenkuana, tapno itayabna ida ti angin ken ipalaisna ida a kas iti taep a mapuoran. (Mt 3:12; Lu 3:17) Umasping iti dayta, kas naipadto, sakbay pay daytoy inusaren ni Jehova ti Babilonia a mangitaep iti ilina, nga inwarawarana ida gapu iti pannakaabakda. (Jer 15:7) Ket babaen ken mammadto Isaias, impanamnama ni Jehova iti ilina a dumtengto ti tiempo a pagbalinenda a kas taep dagiti kabusorda ket itaepda ida. (Isa 41:14-16) Iti Jeremias 4:11, ti “makasiram nga angin” a dumteng maibusor iti Jerusalem ket naikuna a “saan a pangitaep, saan met a pangdalus.” Yantangay ti nadawel unay ken makasiram nga angin ket saan a maikanatad iti panagtaep, tumukoy ngarud daytoy iti makadadael a kasasaadna.