Report dagiti Manangibunannag ti Pagarian
Ti Namnama ti Panagungar
TI NAMNAMA ti panagungar ket paset ti “pamunganayan a doktrina” ti Biblia ket mangted dayta iti naespirituan a bileg iti maysa a tao no naipasango ken patay. (Hebreo 6:1, 2; Juan 5:28, 29) Ni Jehova iti nangted iti daytoy a namnama. Maysa nga estudiante idiay Japan ti nangparang-ay iti daytoy a namnama ket inranudna dayta kadagiti dadduma.
Idi daytoy nga estudiante ti damo a nakasarita ti maysa nga agibumbunannag iti Pagarian, madina kayat ti mangala kadagiti pagbasaan ti Biblia agsipud ta dina kayat ti agbasa. Nupay kasta, isut’ naawis a mapan idiay Kingdom Hall dagiti Saksi ni Jehova ket isut’ sibabara a naabrasa. Nagustuanna ti nangngeganna ket iti kamaudiananna inawisna dagiti tallo a kakaduana iti high school a makikuyog kenkuana, ket isuda amin kimmuyogda. Amin dagiti uppat ti maibilbilangda a “dakes” nga ubbing babaen kadagiti mannursuroda.
Bayat iti panagad-adalda iti libro a Ti Kinaagtutuboyo—Pananggunod ti Kasayaatan iti Dayta, nagbalbaliw ti rebelioso a kababalinda, daytoy ti nadlaw ti mannursuroda, nga isu metten ti nagbalin nga interesado ket nangrugi a makipaset iti panagad-adalda ti Biblia. Ti lider dagiti “managdakdakes” nga ubbing ti managsaksakit ket natay idi agtawen ti 15. Numan pay timmabuno iti Nakristianuan a panaggigimong dagiti Saksi ni Jehova iti apagbiit, isut’ nakaibangon iti nakaskasdaaw a pammati. Gapuna sakbay ti ipapatayna isut’ nagsurat ken nangiyebkas ti napigsa a pammatina iti namnama ti panagungar. Kunana:
“Ti biagko ti agpatingga kalpasan laeng ti sangapulo ket lima a tawen gapu kadagiti komplikasion manipud “dwarfism“ (kinapandek). No idildilig iti maysa a gagangay a tao, nagbiagak laeng iti kakalima ti panagbiagko. Ngem kadagidiay a 15 a tawtawen, addaanak ti pannakapnek. Nangnangruna idi primavera iti maika-15 a tawenko tinagiragsakko dagiti makaay-ayo unay nga al-aldaw. . . . Kasayaatan kadagiti isuamin isu ti pannakaammo nga adda iti maysa a Dios a Mannakabalin-amin a makaagasto kadagiti saksakit ken mangikkatton ken ni patay. Ti pannakaammo a ti maysa a matay ket addaan iti namnama iti panagungar ket pudno a makaay-ayo.”
Daytoy nga agtutubo inay-ayatna ti kasuratan a mangted namnama iti ‘baro a langlangit ken ti baro a daga nga idiay ti pagtalinaedan ti kinalinteg.’ (2 Pedro 3:13) Innayonna: “Maturogakto laeng iti apagbiit. No pagayatan ti Dios, agkikitatayto manen idiay Paraiso. . . . Didak sangsangitan. Matmaturogakto laeng. Agriingakto met laengen iti mabiit. Birukendakto idiay sangaribo-tawen a Pagarian. Urayendak. Saanakto nga agbayag.”
Babaen iti napigsa a pammati ken namnamana daytoy nga agtutubo ti nangparegta kadagiti dadduma. Dua kadagiti mannursurona ken tallo kadagiti gagayyemna ti nagtultuloy a nakipagadal iti Biblia ken tumabtabuno iti gimong dagiti Saksi ni Jehova. Ti namnama ti panagungar ti saan laeng a nangpabileg iti daytoy nga agtutubo no di ket pinabilegna met amin pay dagiti dadduma a mamati kadagiti karkari ni Jehova a Dios.
[Ladawan iti panid 18]
“Maturogakto laeng iti apagbiit. No pagayatan ti Dios, agkikitatayto manen idiay Paraiso.”