Di Nabunga nga Aglawlaw Agpaay ti Ub-ubbing

MAIN-INOT binalbaliwan ti moderno a kagimongan ti aglawlaw a maipaay a pagdakkelan ti nasalun-at nga ubing manipud iti maysa a nabunga a pinagbalin a maysa a kasla lupes, kuna ni Propesor Edward A Wynne, ti University of Illinois. Pabpabasolenna ti nakaro nga indibidualismo, kinabaknang, ken ti pannakapaay ti relihion. “Maawatan a naimbag no apay a sumagmamano a nagannak mariknada a kasla magubgubatda,” kuna ni Propesor Wynne idiay The Wall Street Journal. “Dadduma impangatodan dagiti im-imada ket dagiti makabael a pagassawaan planoda nga itantan wenno uray pay liklikanen ti panaganakda.” Isut’ mangibalbalakad ti pangkontra a pamay-an, kas kadagiti pagassawaan a pagbalinenda a maysa a serioso a banag ti umiso a panangpadakkel kadagiti annak, a mabalin a ramanen dayta ti pannakitimpuyog iti maysa a relihion a mamaregta iti panagkaykaysa ti pamilia ken mangnamnama iti pannakiraman manipud kadagiti miembrona a ti panangdisiplina ket laokanda ti ayat ken panangisakripisio kadagiti kalat ti pannakaidayaw.

Ipagpaganetget ti Biblia daytoy a pakasapulan adu a siglon ti napalabas. Bagbagaanna dagiti nagannak: “Padakkelenyo ida [dagiti annak] kadagiti Nakristianuan a sursuro iti Nakristianuan a panangdisiplina.” (Efeso 6:4, Phillips) Inayon pay nga ipatigmaan ti Sao ti Dios: “Ummongemto dagiti tattao, dagiti lallaki ken babbai ken dagiti ubbing . . . tapno mangngeganda ken masursuroda.” (Deuteronomio 31:12) Ti agtultuloy a panangiyaplikar kadagitoy a prinsipio ti sigurado a makatulong kadagiti pamilia a mangkontra iti agpababa a panangimameg ti moderno a kagimongan.