Mapilpilit dagiti Ig-iglesia

“Ti isyu iti homoseksualidad ti mangrirriribuk kadagiti relihiuso a grupo iti isuamin nga America,” kuna ti The New York Times. “Isuda ti mapilpilit manipud iti ruar a mangpalukay iti gagangay a panangbusorda ket balbaliwanda ti teolohiada.” Dagiti mangimpluensia a bambanag iti pannakapilit isu ti agbalbaliw a kababalin iti sekso ken ti panangikuna a dagiti sasao ti Biblia ti “saan nga umiso ti pannakaipatarusda wenno saan nga umiso ti panangipatarus dagiti bumusbusor ti homoseksualidad.” Kas pangarigan, dagiti manangbabalaw iti gagangay a panangipapan kunaenda a ti siudad ti Sodoma ti nadadael gapu iti kinakurang iti panagpadagos isu a nasken unay kadagiti managbiahe idi ugma, ken gapu iti panggep a mangrames kadagiti bisita​—saan a gapu kadagiti homoseksual nga ar-aramid. Kunaenda met nga idiay Roma 1:26, 27 ti panangtukoy ni apostol Pablo iti panangsukatda ti “nakaparsuaan a pannakaaramatda iti maisalungasing iti nakaparsuaan,” ket basta kaipapananna “ti isisiasida manipud iti gagangay a kababalin ti kultura, saan a ti homoseksualidad kas maysa nga isisiasi iti nakaparsuaan.” Gapuna, adu nga ig-iglesia ti mangbalbaliwen kadagiti kababalinda iti homoseksualidad, ket dadduma ti nangawat payen kadagiti homoseksual kas ministro.

Ngem ti kadi kasta a “panagbalin a moderno” maitunos iti pagayatan ti Dios? “Saan; siak, ni Yahweh, saanak nga agbalbaliw,” sipupudno a kinuna ti Namarsua idiay Malakias 3:6. (The Jerusalem Bible) Ti Biblia kunaenna met a silalawag nga uray dagiti “binabai, uray dagiti tumulad kadagiti taga Sodoma . . . saandanto a tawiden ti pagarian ti Dios.” (1 Corinto 6:9, 10; idiligyo ti Levitico 20:13.) Imbes a kalikaguman dagiti Kristiano a mangala iti ad-adda a siwayawaya a panangmatmat kadagidiay nga agbasol a maibusor iti Dios, ti Biblia mamalakad: “Gapuna pagpanawanyo ti amin a kinarugit ken aglablabes a kinadakes, awatenyo a sieemma ti sao a naimula isu a mannakabalin a mangisalakan kadagiti karkararua.”​—Santiago 1:21.