“Iti Labes ti Siensia”

“Masapul a ditay padayawan ti pammati a petpetpetan dagiti adu a sientista a ti siensia ti kamaudianan iyegnanto ti maudi a kinapudno maipapan iti tunggal banag,” kuna ti Nobel laureate ni Apo John Eccles, maysa a payunir iti panagsirarak iti utek. Iti panangisitarna kadagiti sumagmamano a pangarigan, kinunana a babaen iti panagadal ti ad-adu pay maipapan iti utek, “adu a sientista ken manangipatarus ti siensia . . . irasonda a dumtengto ti aldaw a mailawlawagto ti siensia dagiti ipatpateg, kinapintas, ayat, pannakigayyem, aestetiko ken ti kualidad ti literario.” Ngem, nagpatinga ni Eccles, “dayta a panangmatmat ket ad-adda pay ngem maysa a panagan-anito.” Dagiti pamunganayan a salsaludsod iti biag (Siasinoak? Apay nga addaak ditoy? ken dadduma pay) “ket misterioda amin nga adda iti labes ti siensia,” innayon ni Eccles. Impalagipna ngarud kadatayo a kaaduan iti makunkuna a siensia itatta ket kinaagpasuanna naibatay iti marmargaay a natauan a panagpampanunot.

Insurat ti salmista: “Nasaysayaat ti panagkamang ken Jehova ngem ti panagtalek iti tao.” (Salmo 118:8) Apay a pudno daytoy? Agsipud ta ti siensia saan a makapan iti labes ti namaterialan a lubong. Ngem ni Jehova ti addaan di marukrukod a pannakaammo ket itdenna kadatayo dagiti makapnek a panangilawlawag ti namunganayantayo, ti pannakabukeltayo ken ti panggeptayo iti panagbiag. (Genesis 1:26-28; 2:4; Eclesiastes 12:13) Nupay kasta, kuna ti Biblia a sumagmamano a bambanag ket adda iti labes ti pannakaawat ti tao. (Salmo 139:1-6; Roma 11:33) Ngarud, nainsiriban, a ditay koma rukoden nga aglablabes ti maaramidan ti siensia.