Ti Biag ken Ministerio ni Jesus
Mangrugi iti daytoy a ruar daytoy a magasin, ti baro a paset ti tema nga adda iti ngato agparang iti Ti Pagwanawanan.
ITI napalabas a lima a tawenen, nanipud Marso 1980, maminsan ti makabulan Ti Pagwanawanan addaan dua-panid, naiyilustrar a paset a “Ti Sao ti Dios Nabiag.” Babaen kadagiti ladladawan a napakuyogan iti nalaka a basaen a salaysayna, adu a doktrina ken estoria ti Biblia ti naisalaysay iti nalawag, nalaka a maawatan a pamay-an. Itan maysa a baro a pasetna a mangitamtampok iti biag ken ministerio ni Jesu-Kristo, ti mangsukat iti “Ti Sao ti Dios Nabiag.”
Iti sumaganad a dua a panid makitayo ti umuna a paset daytoy baro a tampokna. Ti sumaganad a sumagmamano a bulan mabalinyo ti manginanama nga umawat iti baro a panagsasagadsad ti kada ruar Ti Pagwanawanan. Daytoy baro a serie dagiti artikulo ti addaan isu met laeng a nabuslon pannakaiyilustrarna, dua-panid a format iti “Ti Sao ti Dios Nabiag.”
Naiyanatup laeng a maitampok ni Jesu-Kristo iti daytoy a pamay-an idiay Ti Pagwanawanan, ta ni Jesus ti addaan dakkel nga impluensia iti estoria ti sangatauan ngem ti sabali a tao. Kaskasdi, napatpateg pay, ti biag ti minilmilion a tao iti amin a rasa ken nasionalidad ti makagunggona a nabalbaliwan idi nga inapresiarda ti panagbiag ken sursurona.
Nalabit adun ti ammoyo maipapan ken Jesus ken ti ministeriona. Ngem maipasagepsepyo aya iti pampanunotyo dagiti panawen ken luglugar dagiti pasamak tapno maisalaysayyo met iti maysa ken maysa ken tapno malaglagipyo met a nasaysayaat ida? Kas pangarigan, kaanot’ panangpili ni Jesus kadagiti 12 nga apostolesna—idi karrugi ti ministeriona wenno idi maud-udi a pasetna? Idi ngata kasakbayan wenno kalpasan a nailasin daydi babai a taga Samaria nga isu ti Kristo? Ken sadino ti ayanna idi pinilina dagiti 12, wenno simimilagro a pinakanna dagiti 5,000, wenno idi intedna daydiay Sermon iti Bantay? Yantangay daytoy baro a paset ti mangisalaysay iti biag ken ministerio ni Jesus iti panagsasagadsadda ken mangipaay agpadpada iti mabuya ken makailadawan a komentariona, dayta makatulongto a mangipasagepsep a naimbag iti pampanunotyo kadagitoy napapateg a pasamak.
Daytoy a paset ti makatulong kadagiti nabayagen a managbasa iti Biblia agraman kadagiti kabbaro pay nga estudiante ti Biblia, ken kadagiti nagannak no iyad-adalanda dagiti annakda. Maipaay met dagiti salsaludsod a maipaay iti daytoy a panggep. Anian a nagsayaat a pamay-an a pangiyam-ammo kadakuada iti nangibangon ti Kinakristiano ken kadagiti sursurona! Mabalin a makakitakayo met kadagiti pamay-an a pangusaranyo kadagitoy nga artikulo iti panangtulong iti pamiliayo ken kadagiti dadduma pay. Laglagipenyo, ngangngani tunggal maysa kaykayatda dagiti estoria, ket adut’ mangtagiragsak kadakuada iti masagasagadsad a pormana a sadiay umawatda kadagiti pinasenpaset a sagpaminsan.
Gapuna, manipud iti umuna a salaysayna, paregtaen dagiti dadduma a makigidgiddan iti daytoy agtultuloy nga estoria. Makitayonto dagiti panagadaw iti Biblia a maisalaysay iti sabali a pannao a maipaay iti nalaklaka a pannakaawat, a maitedto met ti nakaadawanna idiay Biblia iti ngudo ti estoria. Iparegtayo ti panangbasa kadagitoy a salaysay ti Biblia. Wen, usarenyo a naimbag daytoy baro a paset Ti Pagwanawanan iti trabahoyo a panagaramid iti adalan!