Dagiti Saludsod Manipud Kadagiti Managbasa
◼ Addada kadi dagiti bambanag a masapul a liklikantayo a sawen no agkararagtayo ken Jehova?
Wen, addada. Masapul a liklikantayo ti panagsao kadagiti bambanag a nakalablabes ti kinapamiliarna ket ipamatmat kadagiti dadduma (iti publiko a panagkararag) a saantayo a managraem. Dagiti ebkas a kas iti “Naimbag a malemyo, Jehova” ken “Idanonyo ti ayatmi ken Jesus” saanda a maitutop, uray pay dagiti makapakatawa a komento wenno uray pay dagiti ang-angaw kadagiti karkararagtayo. Apay?
Gapu ta, no dagita nga ebkas mausarda iti publiko a panagkararag, mabalin a pagsiddaawenda wenno opendirenda dagidiay a makangngeg. (Roma 14:21) Ngem adda pay naun-uneg a rason no apay a dagiti kakasta nga ebkas ti masapul a maliklikan, uray pay kadagiti pribado a karkararag. Dagitoy nga ebkas ti us-usarentayo iti pannakisarita kadagiti kapadatayo. No mausar iti kararag, isingasingda ti kinakurang iti panagdayaw panagraem, ken mangipaayda iti impresion a ti agkarkararag nalipatannan iti naan-anay a kinabassitna no idilig ken Jehova.—Genesis 18:27; idiligyo iti Lucas 18:9-14.
Pudno a dagiti kristiano maparegtada a mangpataud iti nasinged a relasion ken Jehova. Isut’ inay-ayattayo ket isu ti nailangitan nga Amatayo. (Mateo 6:9; 22:37) Kinapudnona, dadduma a tattao mabalin a maawaganda a dagiti gagayyemna. (Santiago 2:23) Mainayon pay, maawistayo a makisarita ken ni Jehova a buyogen iti wayawaya ti panagsao ket iyebkastayo ti kaungan ti panunottayo ken dagiti personal a parparikuttayo kenkuana.—Salmo 55:1, 2; Filipos 4:6; Hebreo 4:16; 1 Juan 3:21, 22.
Nupay kasta, kalikaguman ni Jehova ti umiso a kababalin kadagidiay nga umadani kenkuana. Kinunana: “Ngem itoy a tao, imatangakto, daydiay met laeng nga isu napanglaw ken napagbabawi nga espiritu ken daydiay nga agkintayeg iti saok.” (Isaias 66:2) Ti kinapasnek iti puso kasapulan met. “Agsublikayo kaniak iti amin a pusoyo,” kuna ni Jehova kadagiti tattaona. (Joel 2:12, 13) Iti sangona awanantayo iti dayaw, awan rason a pagpannakkel, awan kalintegan nga agmandar.
Ipaay pay ti Biblia daytoy a balakad kadagidiay nga agkararag ken Jehova: “Dagiti tattao agbutengda ngarud kenkuana. Isu dina padayawan dagiti asinoman a mamasirib ti pusoda.” “Tungpalennanto ti tarigagay dagiti agbuteng kenkuana, denggennanto met ti ikkisda, ket isalakannanto ida.” (Job 37:24; Salmo 145:19; kitaenyo met ti Salmo 39:5, 12.) Gapuna, nupay no ni Jehova kankanayon a sisasagana nga umimdeng kadagiti karkararagtayo, ti pamay-an ti panangkablaawtayo kenkuana ipakitana koma ti ditay pannakaikari, agraman ti dakkel unay a panagraemtayo kenkuana. Ti aniaman a sabali a pamay-an ti iyaadani iparangarangna ti kinatangsit, kinakurang iti kinapakumbaba, wenno kinakurang ti kinaserioso.
No dadduma dagiti ubbing kadagiti karkararagda mangusarda kadagiti pamiliar unay nga ebkas a mamagbalin pay uray kadagiti dadakkelda nga agisem. Dagiti kakasta nga ebkas ket makaay-ayo a panangipakita iti inuubingan a kinaawan ti pannakaammo ket ipakitana no kasano a pudpudno ni Jehova kadakuada. Nupay kasta, dagiti nataengan, nga ad-adda a makabigbig no ania ti nairaman, ti masapul a mangliklik iti kasta a pananglaglag-an. Masapul nga umadanida ken Jehova a buyogen iti kinapasnek, kinadayaw, kinapakumbaba, buyogen iti kinatan-ok ken kinaserioso.—1 Corinto 13:11.