Palpalubosanyo Aya a Lumapsut ti Kinapudno?
KALPASAN ti pannakalasatda iti puersado a panagdisso iti kabakiran ti Amazon, kaaduan kadagiti pasahero ti bassit pagannayasanda a mangted iti adu nga atension iti nalawa a daga iti aglawlawda. Ngem saan a kasta iti maysa a lalaki a kalmado ken managpaliiw unay! Isut’ maysa a geologo, ket nadlawna no kasano a karkarna ti kinalangalang ti kinelleng a nagdissuan ti helicopterda. Imbes a palubosanna a lumabas ti gundaway, miningminganna a naimbag daytoy langalang a disso. Di nagbayag nalasinna a no kadagiti dadduma daytat’ maysa laeng a kinelleng a daga ngem iti kinapudnona maysa kadagiti makaikari unay a deposito ti mineral a kinabaknang iti lubong—maysa a nagdakkelan a bodega dagiti nava ti landok, bauxite, manganese, gambang, ken balitok a maysa nga aldaw daytanto ti maitan-ok kas ti “baro nga El Dorado.”
Isu daydiay natakkon a tao a manggundaway kadagiti opurtunidad, imbes a palapsuten ida. Usigenyo, kas pangarigan, ti Romano a gobernador a ni Poncio Pilato idi umuna a siglo iti Kadawyan a Panawentayo. Maysa a naisalsalumina a gundaway ti naipasango kenkuana. Dagiti papangulo a Judio ti nangiyawat kenkuana iti katan-okan a mannursuro ti kinapudno a nagbiag pay laeng ditoy rabaw ti daga, ni Jesu-Kristo. Panunotenyo laengen dagiti salsaludsod a nabalinan nga inyimtuod koma ni Pilato! Panunotenyo koma dagiti nababaknang a kinapudno nga inna koma naadal! Ken makapainteres pay, idi damo nga impasangoda ni Jesus kenkuana, nga inakusarda iti panagkunana kas “ti ari dagiti Judio,” medio adda ti panagusioso ni Pilato:
“Sika aya ti ari dagiti Judio?” insaludsod ni Pilato.
Kas sungbat, kuna ni Jesus: “Ti pagariak saan a paset daytoy a lubong . . . Naiyanakak gapu itoy, ken gapu itoy immayak ditoy lubong, tapno paneknekak ti kinapudno. Isuamin nga adda iti dasig ti kinapudno denggenna ti timekko.” Adtoyen ti nabalitokan a gundaway ni Pilato. Adda a sitatakder iti sanguananna ti maysa a lalaki a ti panagbiagna ket sibibiag a pammaneknek iti kinapudno dagiti karkari ti Dios, maysa a lalaki a situtulok ken makabael a manglawlawag a di mabalinan ti dadduma a tattao. Kaskasdi aniat’ sungbat ni Pilato? “Ania ti kinapudno?” Ket isu ti dagdagus a “rimmuar manen kadagiti Judio.”—Juan 18:33-38.
Wen, pinalapsutan ni Pilato ti kinapudno. Ket adu itatta dagiti addaan kapareho a panagbiddut. Ti mismo a pagbasaan a basbasaenyo, Ti Pagwanawanan, ket maipabpablaak a manglawlawag kadagiti tattao maipapan iti kinapudno. Ngem, adu, ti madi pay a mangbasa iti dayta. Dadduma basaenda ken tagiragsakenda dagiti artikulo ngem awanen ti aramidenda kadagiti bambanag kalpasan dayta. Mabalin kadi a dagiti kakasta ket, kas ken Pilato, a baybay-anda a lumapsut ti kinapudno?