Malagipyo Pay Aya?

Inikkanyo kadi ti naannad a panangpampanunoten dagiti nabiit pay a ruar ti The Watchtower? No kasta, mabalin a malagipyo dagiti sumaganad:

◻ Kasano kasaknap ti panangipakita ni Jesus ti ayatna iti sangatauan?

Sibuboluntario a pinanawanna ti nailangitan a pagtaenganna a natalna ken natalged tapno umay makipangan, makiturog, ken makilangen kadagiti masaksakit ken matmatay a sangatauan. Kalpasan daytoy, sibuboluntario nga inted ni Jesus ti perpekto a natauan a biagna tapno itden ti subbot a pakagunggonaan ti sangatauan. (Mateo 20:28)​—12/15, panid 3, 4.

◻ Ania dagiti personal a gunggona a maited iti Kristiano babaen ti panangsanayna iti panagteppel?

Magun-odan ti Kristiano ti dakdakkel a panagraemna met laeng iti bagina babaen iti panangwatwat iti panagteppel. Kasta met, tagiragsakenna ti dakdakkel a talna ken ragsak iti pamilia, kongregasion, ken iti inaldaw a pannakilangen. Kangrunaanna, ti panagteppel ti mangtulong kenkuana a mangibangon ti nasayaat a pannakirelasionna iti Namarsuana ken iti panangipabigbigna iti bagina kas pudno a Kristiano.​—12/15, panid 24.

◻ Ania koma ti kangrunaan a motibo ti panangipakita ti kinamanagpadagos?

Numan pay makaay-ayo ti panangawat ti ebkas ti panagyaman manipud kadagiti dadduma ken malasin nga apresiarenda ti panagreggettayo, rebbeng a tarigagayantayo ti panangipakita ti kinamanagpadagos nangnangruna gapu ta dayta ti umiso ken naayat a banag nga aramiden. Mainayon pay, daytat’ makaparagsak ken Jehova a Dios no aramidentay dayta.​—1/15, panid 22.

◻ Kasano a ti nakasakay iti puraw a kabayo, a nailadawan idiay Apocalipsis 6:2, apektaranna ti panagbiagyo?

Ni Jesus ti nakasakay iti puraw a kabayo, ket rinugianna ti nailangitan a panagsakayna idi 1914. Iti panangipadtona no kasano a maapektaran dagiti tattao gaput’ panagturayna, kinunana: “Ngem inton ti Anak ti tao umayto agraman ti dayagna . . . paglalasinennanto dagiti maysa ken maysa kas ti pastor ilasinna dagiti karnero kadagiti kalding.” Itatta, malasinlasin ti sangatauan, ket no kasano ti isusungbatyo iti mensahe iti Pagarian kaipapananna ti biag wenno ipapatay kadakayo. (Mateo 25:31-33; 24:14)​—1/15, panid 6.

◻ Ania dagiti sumagmamano a pamay-an a pangliwliwa ken pangsustiner ni Jehova kadagiti ad-adipenna?

Liwliwaen ken sustiniren ni Jehova dagiti ad-adipenna babaen ti nasantuan nga espirituna. (1 Pedro 4:12-14) Liwliwaenna met ida babaen iti panangsungbatna kadagiti karkararagda. (Filipos 4:6, 7) Mainayon pay, ti Sao ti Dios ti dakkel a gubuayan ti liwliwa, nga ipasigurona kadagiti ad-adipenna nga awan ti mapasamak kadakuada a di makita wenno di timbengen ni Jehova.​—2/1, panid 19.

◻ Ania ti apocalipsis a naipadto idiay Biblia?

Isu dayta ti napili nga ibaballaet ti Dios kadagiti natauan nga ar-aramid.​—2/15, panid 7.

◻ Aniat’ kaipapanan dagiti sasao ni Jesus a “biag kadakayo met laeng,” idiay Juan 6:53?

Idiay Juan kapitulo 6, ipadpada ni Jesus ti “biag nga agnanayon” iti kaadda ti “biag kadakayo met laeng,” kayatna a sawen, ti iseserrek iti kamaudiananna iti kinanaan-anay ti biag. Ti “bassit nga ipastoran” dagiti agtawid iti Pagarian lak-amendanto dayta iti panagungarda kadagiti langlangit ket ti “sabsabali a karnero” pasarendanto dayta kalpasan ti panungpalan ti Sangaribo a Tawen a Panagturay ni Kristo Jesus. (Apocalipsis 20:4, 5)​—2/15, panid 19.

◻ Ania a prinsipio a naipaganetget iti intero a libro iti Nehemias ti maysa a leksion para kadatayo itatta?

Ti prinsipio a “no saan a ni Jehova ti mangbangon iti balay, agbannogda a barengbareng dagiti managbangon.” (Salmo 127:1) Itatta, kadagiti amin nga ar-aramidtayo, agballigitay laeng no addaantay ti bendision ni Jehova.​—2/15, panid 26.

◻ Aniat’ nangsustiner ken ni Job bayat dagiti pannakasuotna, ket kasano a makatulong daytoy kadatayo itatta?

Addaan panagtalek ni Job a saan a kastoy laengen ti biag. (Job 14:13-15) Ti kaadda daytoy met laeng a panagtalek itatta, a pagungaren ni Jehova dagiti matalek nga ad-adipenna, ti makatulong kadatayo a sumango kadagiti aniaman a suot a mabalin nga ipatay ni Satanas kadatayo. (Hebreo 6:10; 11:6)​—3/1, panid 20.

◻ Ania a leksion ti maadal dagiti nagannak manipud iti imbunga ti basol ni David ken Batseba?

Impaay ni Jehova ti asina ken David gapu iti tulag ti Pagarian, gapuna napalubosan nga agtultuloy a sibibiag ni David ken ni Batseba. Nupay kasta, kinuna ti pannakabagi ni Jehova kadakuada: “Agsipud ta iti daytoy nga aramid nangtedka iti gapu kadagiti kabusor ni Jehova tapno agtabbaawda, kasta met ti anak a lalaki a maiyanak kenka matayto a di bumurong.” (2 Samuel 12:14) Daytoy ti rebbeng a mangipaganetget kadagiti nagannak a ti kababalinda ti mangapektar unay kadagiti annakda.​—3/15, panid 31.

◻ Aniat’ makalikaguman no ti maysa agbalin a naanamongan a makitimpuyog kadagiti Saksi ni Jehova?

Masapul nga awaten dayta a tao ti intero a pannursuro ti Biblia, agraman dagidiay Nainkasuratan a pammati a naisangsangayan kadagiti Saksi ni Jehova.​—4/1, panid 31.

◻ No sumrek ti dakes a pampanunot iti isiptayo sagpaminsan, aniat’ rebbeng nga aramidentayo?

Masapul a ditay koma pagtalinaeden ti is-isiptayo kadagiti dakes a pampanunot. Tapno matulongantayo a mangaramid iti daytoy, masapul nga agturongtayo ken Jehova iti kararag a dagdagus, ‘nga iyallatiwtayo ti awittayo ken Jehova.’ (Salmo 55:22)​—4/1, panid 25.