Report Dagiti Manangiwaragawag ti Pagarian
Iti Uneg Laeng ti Siam nga Aldaw!
“NAKASKASDAAW!” Dayta a maymaysa a sao ti paulo ti maysa nga editorial ti diario idiay Vancouver Island, Canada, idi Agosto 14, 1985. Insalaysay ti editorial ti pannakaibangon ti 25,000-pie-kuadrado (2,300 sq m) nga Assembly Hall iti uneg laeng iti siam nga aldaw.
Iti napalabas a sangapulo a tawtawen, napataud dagiti Saksi ni Jehova ti pamay-an ti nadaras a panangibangon kadagiti lokal a Kingdom Halls. Ngem ti Vancouver Island Assembly Hall of Jehovah’s Witnesses ti maikadua kadagita a patakder idiay Canada a nairanta a nangnangruna nga agpaay kadagiti mamindua ti makatawen nga asamblea sirkito ti grupo dagiti kongregasion. Ti kabarbaro a balay ti nagsaad iti maysa a walo acre (3 ha) a disso idiay Cassidy, British Columbia. Dagiti natatayag nga evergreens ti nangted iti nagpintas a likudan, bayat a maysa a makaay-ayo a karayan ti limmasat iti lote iti likudan ti patakder. Ramanen dayta ti maysa nga auditorium a pagtugawan ti 900, maysa a kapeteria, a pagtugawan ti 250, ti lugar a pagpalamiisan, ti binaldosa a bassit a pagbautisaran, ken ti maysa a Kingdom Hall a pagtugawan ti 200 nga us-usaren dagiti lokal a kongregasion. Uray pay dagidiay nakiraman iti pannakaibangonna kunada a narigat a patien a daytat’ naibangon ken nalpas iti siam nga aldaw.
Siempre, sakbay ti siam nga aldaw a panagbangon, adu a trabaho a panagsagana ti naaramidan. Ti napalabas a patakder iti dayta a disso rinakrakda ken sinalbarda dagiti dadduma a pasetna—kabayatan iti kasla maibuybuyat a panagtudona. Sinaranget dagiti nagboluntario a trabahador ti nabasa, nalam-ek a panawen ti Oktubre tapno agani ti kayo a pagbalinen a cedar shakes—ti napuskol a natural nga atep a naaramid manipud iti western red cedar. Ti pannakaikapet dagiti tubtubo, pagpapudot, pagpalamiis, elektrikal, ken dagiti dadduma a sistema ti masapul a madisenio. Masapul met a maisagana ti disso ken ti 25,000-pie kuadrada a konkreto naisaad—malaksid kadagiti dadduma a bambanag.
Kamaudiananna, nupay kasta, isuaminen ti adda a sisasagana. Idi Sabado, Agosto 3, iti alas 8:00 t.b., kalpasan ti panangusig iti maysa a teksto ti Biblia, sisasaganan dagiti boluntario a siiggem kadagiti martilio iti daydiay nakasagana a konkreto nga slab. “Kakabsat, rugianyon ti agmartilio!” isu ti immay nga awag kadagiti loudspeakers. Pinulpullo a martilio ti immaweng a nangtuktok kadagiti lansa bayat a ti napattapatta a 4,500 a boluntario nangrugidan a nagtrabaho. Adu kadagiti boluntario ken ti pampamiliada ti naggapu idiay Estados Unidos ken dadduma ti naggapu manipud nakaad-adayo a Newfoundland, Norway, ken Inglatera. Dagiti manangngaasi a kaarruba impausarda dagiti kataltalonanda a pagkampuan ken pagparadaan, ken agpaay a pagbangonan ti tolda, campers, dagiti trak, ken dagiti kotse ti nangsaknap iti 35 acres (14 ha) iti aglawlaw dayta a disso.
Nagsiddaaw unay dagiti agbuybuya. Maysa a kontratista ti nangiyeg kadagiti empleadona tapno paliiwenda ti trabaho ken tagiragsaken ti kasasaad ti aglawlaw. Dagiti manangngaasi a kaaruba indonarda dagiti natnateng idiay departamento a pagsaganaan ti taraon a nagsagana kadagiti regular a pannangan nga agpaay kadagiti trabahador. Dadduma kadagiti kaaruba timmulongda iti aktual a trabaho. Maysa a lalaki, kalpasan ti ibibisitana iti dayta a disso, kunana: “Pudno a makitak a ti Dios adda kadakayo a tattao.” Daytoy a lalaki ti rumangrang-ay itan iti panagad-adalna ti Biblia a kadua dagiti Saksi.
Ti editorial iti Ladysmith-Chemainus Chronicle ti nagkomento: “Aniaman ti narelihiusuan a pammatiyo, wenno kinakurangyo iti dayta, kasapulan nga iyawatyo dayta kadagiti 4,500 a Saksi ni Jehova nga agtartrabaho iti aldaw ken rabii bayat ti napalabas a maysa ket kagudua a lawas tapno makaibangon iti maysa a 25,000-pie-kuadrada nga Assembly Hall idiay Cassidy . . . Ti panangaramid a siraragsak iti daytoy nga awan dagiti panagaapa, panagsisina wenno panangala iti dayaw ket maysa a tanda ti pudno a Kinakristiano.”
Iti Domingo, Agosto 11, iti alas 6 t.r., naaramid ti umuna a panaggigimong iti dayta nalpasen, napapintasen ti aglawlawna nga Assembly Hall!