Ti Biag ken Ministerio ni Jesus

Panangsungbat kadagiti Manangidarumna

ITA Aldaw ti Panaginana. Ni Jesus inagasanna ti maysa a lalaki a masaksakiten iti 38 a tawen. Ngem dagiti relihiuso a papangulo a Judio ti nangakusar kenkuana a mangsalsalungasing iti Panaginana. Simmungbat ni Jesus: “Ni Amak agingga ita aggar-aramid, ket agar-aramidak met.”

Agpapan pay iti panagkuna dagiti Pariseo, ti aramid ni Jesus ket saan a daydiay kita nga iparparit ti linteg ti Panaginana. Ti trabahona a panangaskasaba ken panangpaimbag ket maysa a trabaho a naggapu iti Dios, ket kas panangtulad iti ulidan ti Dios, itultuloyna nga ar-aramiden dayta iti inaldaw. Nupay kasta, ti sungbatna ti ad-adda a namagpungtot kadagiti Judio ngem idi sakbayna, ket sinapsapulda ti panangpapatayda kenkuana. Apay?

Agsipud ta saanda laeng a patienen a ni Jesus ti mangsalsalungasing iti Panaginana no di ket imbilangda kas maysa a panagtabbaaw ti panagkunana kas personal nga anak ti Dios. Nupay kasta, di agbuteng ni Jesus ket sinungbatanna ida nga ad-adda iti daytoy naparaburan a pannakirelasionna iti Dios. “Ti Ama ayatenna ti Anak,” kunana, “ket ipakitana kenkuana dagiti amin nga aramidenna.”

“Kas ti Ama pagungarenna dagiti natay,” intuloy ni Jesus, “kasta met ti Anak ikkanna ti biag dagiti kayatna.” Pudno unay, ti Anak ti mangpagpagungaren kadagiti natay iti naespirituan a pamay-an! “Ti dumngeg iti saok ket patienna ti nangibaon kaniak,” kuna ni Jesus, “ket nanipud ken patay immalis iti biag.” Wen, intuloyna: “Umay ti oras, ket adda itan, a dagiti natay mangngegdanto ti timek ti Anak ti Dios ket dagiti agdengngeg agbiagdanto.”

Nupay agingga iti daytoy a kanito,awan pay ti rekord a literal a nangpagungar ni Jesus iti asinoman manipud ken patay, imbagana kadagiti manangakusarna a ti kasta a literal a panagungar dagiti natay ti mapasamakto. “Dikay pagsiddaawan daytoy,” kunana, “ta umay ti oras a dagiti amin nga adda iti tanem a pakalaglagipan mangngegdanto ti timekna ket rummuardanto.”

Agingga iti daytoy, kaawatan a pulos di pay nga inlawlawag ni Jesus iti publiko ti nasken nga akemna iti panggep ti Dios iti kasta a nakalawlawag ken piho a pamay-an. Ngem dagiti manangakusar ni Jesus addaanda iti ad-adu pay ngem ti bukodna a pammaneknek maipapan kadagitoy a bambanag. “Nangibaonkayo ken ni Juan,” impalagip ni Jesus kadakuada, “ket pinaneknekanna ti kinapudno.”

Dua a tawen laeng sakbayna, imbaga ni Juan a Mammautisar kadagitoy a narelihiusuan a papangulo dagiti Judio maipapan iti Daydiay sumaruno kenkuana. Babaen ti panangipalagipna kadakuada iti daydiay naminsan pagraraemanda unay nga isu ti naibaluden a ni Juan, kuna ni Jesus: “Ket kinayatyo ti nagrag-o iti apagbiit iti lawagna.” Impalagip ni Jesus daytoy iti pampanunotda iti pananginanama a makatulong, wen, tapno ispalenna ida. Kaskasdi isut’ di nagpannuray iti pammaneknek ni Juan.

“Dagita met laeng nga aramid nga aramidek [agraman ti milagro a kaar-aramidda pay laeng] paneknekanda ti maipapan kaniak a ti Ama imbaonnak.” Ngem malaksid iti dayta, intuloy ni Jesus: “Ni Ama a nangibaon kaniak paneknekanna ti maipapan kaniak.” Ti Dios pinaneknekanna ti maipapan ken ni Jesus, kas pangarigan, iti daydiay pannakabautisarna, a kunkunana: “Daytoy ti Anakko, a dungdungoek.”

Pudno unay, dagiti manangakusar ni Jesus awan pambarda a pangilaksidan kenkuana. Dagiti mismo a Kasuratan a kunada a suksukimatenda ti mangpaneknek maipapan kenkuana! “Ta no pinatiyo ni Moises pinatidak koma,” nagpatingga a kinuna ni Jesus, “ta isu nagsurat ti maipapan kaniak. Ngem no dikay patien dagiti sursuratna, kasanonto ti pammatiyo kadagiti saok?” Juan 5:17-47; 1:19-27; Mateo 3:17.

◆ Apay a ti aramid ni Jesus saan a panangsalungasing iti Panaginana?

◆ Kasanot’ panangisalaysay ni Jesus iti nasken a pasetna iti panggep ti Dios?

◆ Tapno paneknekan nga isut’ Anak ti Dios, makin-pammaneknek ti intudo ni Jesus?