Dagiti Moderno a Nagdakes a Panangabuso ti Pannakabalin
ITI linteg a naited babaen ken Moises, sipipigsa ti panangilunod ti Namarsua iti panangawat ti pasuksok iti biang dagiti uk-ukom. (Exodo 23:8; Deuteronomio 10:17; 16:19) Makitatayo no kasano ti kinanainsiriban dayta a pammagbaga babaen ti panangsalaysay ti sumagmamano kadagiti moderno a kaso ti di umiso a panangusar dagiti opisiales ti pannakabalin.
Maysa kadagita ti nakairamanan ni Ukom Martin T. Manton. Idi 1918 pinadasna a linapdan ti panagregget dagiti Estudiante ti Biblia, nga isu ti pannakaaw-awag dagiti Saksi ni Jehova idi, a makagun-od iti piansa a maipaay ken J. F. Rutherford ken pito kadagiti kakaduana. Naidarum dagitoy walo a Kristiano a ministro a mangsingsinga iti panagregget ti gubat ket naipupokda iti pedreal a pagbaludan idiay Atlanta, Georgia. Ti korte ti panagapelar a nangdengngeg ti kasoda ti buklen dagiti tallo nga uk-ukom, agraman ken ni Manton. Isu ti nagmadi, ngem dagiti dua nga uk-ukom ti nangipalubos iti panagapelar, ket ti di umiso a pannakapabasol ti nabaliwan.
Ania a kita ti ukom ni Manton? Dagiti pagiwarnakan ti nangawag kenkuana “ti kangangatuan ti ranggona nga opisial ti pangukoman [idiay Estados Unidos] a sumarsaruno kadagiti siam a Mahistrado ti Korte Suprema.” Isut’ maysa met kadagiti agdindinamag a laigo, idiay America, nga isut’ pinagbalin ti papa a “Kaballiero ni San Gregorio.” Ti pannakatnag ni Manton immay idi nga isu ti napabasol ken nasentensiaan nga agbalud iti dua a tawen ken agmulta ti $10,000. Gapu iti ania? Gaput’ panangilaklakona kadagiti hudisial a desision. Nangnangruna pay ngem iti dayta, adda pay turedna a mangbutbuteng kadagidiay agparang iti sanguananna, a butbutngenna ida a malaksid no bayadanda iti dakkel a kantidad, isu ti agdesision a maibusor kadakuada. Kuna ti The New York Times maipapan kenkuana: “Ti panangkuarta (blackmail) ti agapgapu manipud iti pangukoman a Pederal.” Anian a panangubuso iti hudisial a pannakabalin!
Adu a tawtawen pay iti kamaudiananna maysa pay a nakadakdakes a kaso ti timpuar, a nakairamanan ni Spiro Agnew, bise presidente ti Estados Unidos manipud 1969-73. Isut’ naidarum gaput’ panangkusitna ti gobierno iti rinibribo a doliar, ket isu ti nagresign. Agingga idi 1983, binayadanna ti estado ti Maryland iti nasurok a $250,000 gapu kadagiti pasuksok nga inaw-awatna.
Kalpasanna adda ni Richard M. Nixon, a nangpili ken ni Agnew nga agturay kas bise presidente. Ti komite ti Senado ti E.U. a nangtaming iti kaso ti Watergate ti nangirekomendar a ni Nixon ti maikkat iti tallo a bilang: nga inabusona dagiti pannakabalinna kas presidente; a linapdanna ti kinahustisia; ken sinukirna dagiti subpoena. Mabalbalin nga ammoyo nga isu ti nagresign idi Agosto 9, 1974, nga adda pay dua ket kagudua a tawen a nabati iti kinapresidentena.
Ti kasta a panangabuso ti pannakabalin ti sangalubongan. Kas pangarigan, ti magasin ti Canada a Maclean’s a Hulio 15, 1985, ti nangipadamag maipapan ti “nadawel a panagrambak ti sekso idiay Parliament Hill . . . ken kadagiti di autorisado a pinansial a panagbayad.” Insalaysay dayta nga iti maysa a padaya ti maysa a senior a personel ti gobierno imbagana iti 3-años a babai: “No dika agussob, dikanto maala iti trabaho.”
Maigiddato iti dayta, maysa nga internasional a magasin ti damdamag impablaakna ti artikulo a “Ti Korupsion Pinabannayatna ti Irarang-ay ti China.” Impadamag dayta: “Iti ngangngani tunggal aglabas nga aldaw, ti opisial a pagiwarnakan ti addaan kadagiti salaysay ti pinansial a kinasiutik, a dadduma iramanna dagiti nangangato ti ranggona nga opisiales.”
Iti nabibiit pay, ti New Zealand Herald, iti paulo a: “Ti Panangilunod ti Korupsion kangrunaan a Peggad iti ‘Nasuerte a Pagilian,’” kuna ti panangmatmat ti maysa a retirado nga ukom: “Ti Australia, iti katengngaan ti 1980s, ti nabaknang, natalged ken narugit.” Nadakamat ti artikulo ti “maysa a sistema ti hustisia nga iti napalabas a tawen nakitana ti maysa a hues manipud iti kangatuan a pangukoman iti daga a naibalud ket dayta ti mapaspasamak iti ngangngani inaldaw a buyogen dagiti makapakellaat a pammaneknek dagiti matiltiliwan a polis.”
Nalawag kadagita amin a dagita a manangabuso ti pannakabalin dida inkankano ti prinsipio a kinuna ni Kristo: “Awan ti naabbongan a di maipanayagto, ken nailemmeng a di maammuanto.”—Mateo 10:26.