Ti Biag ken Ministerio ni Jesus

Ti Kalalatakan Unay a Sermon a Naibitla

TI BUYA ket isut’ maysa kadagiti nakalaglagip unay iti historia ti Biblia: Ni Jesus ti situtugaw iti igid ti Bantay, a mangipapaay iti kalatakan a Sermonna iti Bantay. Ti lugar ket idiay asideg ti Baybay ti Galilea, nalabit asideg iti Capernaum. Binusbos ni Jesus ti agpatpatnag iti panagkarkararag iti Dios, ket iti sumaruno a bigat isut’ nangpili iti 12 kadagiti adalanna nga agbalin nga apostolesna. Kalpasanna, kaduana ida amin, isu ti immay iti daytoy napatag a lugar iti bantay.

Itatta, mabalin a pampanunotenyo, a ni Jesus ti nakabambannogen ket kayatna koma ti maturog. Ngem immay ti dakkel a bunggoy, a dadduma ti manipud pay idiay Judea ken Jerusalem, 60 agingga ti 70 a milias (100 ingganat’ 110 km) ti kaadayona. Dadduma naggapuda manipud iti igid ti baybay ti Tiro ken Sidon iti amianan. Immayda denggen ni Jesus ken paagasan kadagiti saksakitda. Addada pay tattao a rirriribuken dagiti demonio.

Bayat a bumabbaba ni Jesus, umasideg dagiti tao a masaksakit a mangsagid kenkuana, ket inagasanna ida amin. Kalpasanna, nalawag nga immuli ni Jesus iti nangatngato a paset ti bantay. Sadiay isut’ nagtugaw ket rinugianna a sinursuruan ti umariwekwek a naisaknap iti napatag a lugar iti sanguananna. Ket panunotenyo dayta! Ita awan pay uray maysan a tao iti intero a bilang dagiti agdengdengngeg ti agsagsagaba manipud iti nadagsen nga an-anayen!

Magagaran dagiti tattao a dumngeg iti mannursuro a nakaaramid kadagitoy nakaskasdaaw a datdatlag. Ni Jesus, nupay kasta, impaayna ti sermonna a nangnangruna agpaay a pakagunggonaan dagiti adalanna, a nalabit isuda ti naurnong iti asideg unay kenkuana. Ngem tapno aminda ket magunggonaan, agpadpada a dayta ti inlanad ni Mateo ken ni Lucas.

Ti salaysay ni Mateo iti sermon ket agarup uppat a daras nga at-atiddog ngem ni Lucas. Mainayon pay, dagiti paset ti insurat ni Mateo, ket imparang ni Lucas kas sinao ni Jesus iti sabali a tiempo bayat ti ministeriona, kas makita no pagdiligenyo ti Mateo 6:9-13 iti Lucas 11:1-4, ken ti Mateo 6:25-34 iti Lucas 12:22-31. Kaskasdi daytoy ti saan a pagsiddaawan. Kaawatan nga insursuro ni Jesus dagiti isu met laeng a bambanag a di la namnaminsan, ket pinili ni Lucas nga ilanad ti dadduma kadagitoy a pannursurona iti naiduma a kasasaad.

Ti namagbalin iti sermon ni Jesus a nakapatpateg ket saan laeng a ti kinauneg ti naespirituan a linaonna no di ket ti kinasimplena ken ti kinalawag ti panangiparangna kadagitoy a kinapudno. Isut’ nagadaw manipud kadagiti gagangay a kapadasan ket nagusar kadagiti bambanag a gagangayen kadagiti tattao, iti pinagbalinna a nalaklaka a maawatan dagiti kapanunotanna babaen kadagiti amin nga agsapsapul iti nasaysayaat a panagbiag iti pamay-an ti Dios. Kadagiti sumaganad a ruar sukimatentayto ti sumagmamano kadagiti bambanag a kinunana. Lucas 6:12-20; Mateo 5:1, 2.

◆ Sadino ti nakaipaayan ti nakalaglagip unay a sermon ni Jesus, ket siasino dagiti siimatang, ket aniat’ napasamak kasakbayan unay ti panangitedna iti dayta?

◆ Apay a saan a nakaskasdaaw nga inlanad ni Lucas ti sumagmamano kadagiti pannursuro ti sermon iti sabali a kasasaad?

◆ Aniat’ mamagbalin a nakapatpateg unay ti sermon ni Jesus?