“Ti Anakko Dinak Pagtalnaen Uray Maysa a Minuto”

DAYTA ti kuna ti maysa nga ama idi immay ti sanga nga opisina iti Watch Tower Society idiay Peru iti nabiit pay. Inlawlawagna:

“Ti anakko a lalaki rirriribukennakon iti adu a lawas, ta kayatnak a mangala nga agpaay kenkuana iti libro a Ti Librok dagiti Estoria ti Biblia. Nanipud pay maysa kadagiti kaeskuelaanna ti nakagun-od iti dayta, ti anakko a lalaki dinak pagtalnaenen uray maysa a minuto. Nagadun ti nagsapsapulak no sadino ti pakaalaak ti kopia. Awan pulos ti uray bassit nga ideak no sadino ti pangrugiak. Ti panagsalsaludsodko kadagiti paglakuan ti libro ti awan inyegna a resulta.

“Nasaok dayta iti maysa kadagiti kaopisinaak, ket kunana a mapanak kadagiti Saksi ni Jehova tapno makaalaak iti dayta. Kunak, ‘Ay, saan! Saan a kadagidiay a tattao. Isuda ti kanayon nga um-umay iti balaymi, ket kanayon a pappapanawek ida.’ Ngem kinumbinsirnak ta saankayo met a kasta kadakes​—kinapudnona, nagsayaat ti panagsaona maipapan kadakayo ket kunana a ti libro a birbirukek ket talaga a maysa a nagsayaat a libro. Gapuna addaak ditoy. Kayatko dayta a libro.”

Patienmi, nga uray dakayo met, tarigagayanyo daytoy nagpintas pannakaiyilustrarna, dadakkel letrana a pagbasaan. Dagiti 116 a salaysayna iti Biblia ti mangipaay iti managbasa iti idea no ania ti linaon ti intero a Biblia.

Pangngaasiyo, ta patulodandak, a nabayadanen ti seliona, ti natangken ti akkubna a pagbasaan a Ti Librok dagiti Estoria ti Biblia, a pangilukonak ti ₱35.