Ti Biag ken Ministerio ni Jesus

Ti Nangato a Pagalagadan ti Paspasurotna

DAGITI narelihiusuan a papangulo imbilangda ni Jesus a managsalungasing ti Linteg ti Dios ket iti nabiit pay nagkokomplotda a mangpapatay kenkuana. Gapuna bayat ti panangitultuloy ni Jesus ti Sermonna idiay Bantay, inlawlawagna: “Dikay pagarupen nga immayak a mangdadael iti Linteg wenno kadagiti Mammadto. Saanak nga immay a mangdadael, no di ket mangtungpal.”

Dakkel unay ti pammadayaw ni Jesus iti Linteg ti Dios ket pinaregtana met dagiti dadduma a maaddaan iti kasta a pammadayaw. Kinapudnona, kinunana: “Gapuna, uray siasino a mangsalungasingto iti maysa kadagitoy bilin a kababassitan ken mangisuro iti kasta kadagiti tattao, managanto ti ‘bassit unay’ idiay pagarian ti langit,” a kayatna a sawen a ti kasta a tao ket saanto a makadanon a pulos idiay Pagarian.

Imbes a panangipababa iti Linteg ti Dios, kinondenar ketdi ni Jesus ti kababalin a makatulong iti panangsalungasing iti dayta. Kalpasan ti panangipalagipna iti kuna ti Linteg, “Dika mamapatay,” innayon ni Jesus: “Ngem, kunak kadakayo nga uray siasino nga agtultuloy a gumura iti kabsatna agpeggadto iti pangukoman.”

Gapu ta ti agtultuloy a pananggura iti maysa a kalangenlangen serioso unay, a nalabit mabalin nga agturong pay iti panangpapatay, inyilustrar ni Jesus ti danonen ti maysa tapno maragpatna ti talna. Insurona: “Ngarud, no agidatagka ti [sakripisial] a datonmo iti altar ket idiay malagipmo a ni kabsatmo adda aniaman kenkuana a maibusor kenka, panawam sadiay ti datonmo iti sanguanan ti altar, ket inka; makikappia nga umuna pay ken kabsatmo, ket kalpasanna, umayka ket igay-atmon ti datonmo.”

Iti panangiyawagna ita iti atension iti maikapito kadagiti Sangapulo a Bilbilin, intuloy ni Jesus: “Nangngegyo a naisao, ‘Dika makiabig iti saanmo nga asawa.’” Nupay kasta, kinondenar pay ni Jesus ti agtuloy a kababalin nga agturong iti pannakiabig. “Ngem siak kunak kadakayo nga uray siasino a mangmatmat iti maysa a babai tapno gartemanna nakiabigen kenkuana iti pusona.”

Saan a sasawen ni Jesus ditoy maipapan iti aglabas laeng nga imoral a kapanunotan no di ket ti ‘agtultuloy a panangmatmat.’ Ti kasta nga agtultuloy a panangmatmat ti manggargari iti derrep, a no maikkan iti gundaway, ket agtungpal iti pannakiabig. Kasano a malapdan ti maysa a tao ti pannakapasamak daytoy? Inyilustrar ni Jesus no kasano ti pannakasapul ti aglablabes a panagtignay, a kunkunana: “Ket, no ta matam a makingkanawan isu ti mangted kenka ti pakaitibkolan, isu suatem, ket ibellengmo. . . . Ket, no ta imam a makingkanawan isu ti pakaitibkolam, isu ti putdem ket ibellengmo.”

Masansan a situtulok dagiti tattao a mangisakripisio iti maysa a literal a saka wenno ima nga adda sakitna tapno maispal ti intero a biagda. Ngem sigun ken Jesus, ad-adda a napatpateg ti ‘panangibelleng’ iti aniaman, uray pay kas ti kapateg ti mata wenno ima, tapno maliklikan ti dakes a panagpampanunot ken ar-aramid. Ta no saan, inlawlawag ni Jesus, dagita a tattao ti maibellengto idiay Gehena (ti maysa a mapupuoran a pagibasuraan idiay asideg ti Jerusalem), a mangisimsimbolo iti agnanayon a pannakadadael.

Sinalaysay pay met ni Jesus no kasano ti pannakilangen kadagiti tattao a makapataud iti pakadangranan ken pakasaktan. “Dikay sarangten ti dakes,” ti balakadna. “No di ket ti uray siasino a tumungpa iti pingpingmo a makanawan, iparangmo pay kenkuana ti bangir.” Di kayat a sawen ni Jesus ditoy a di rebbeng nga idepensa ti maysa a tao ti bagina wenno ti pamiliana no isuda ti maraut. Ti tungpa ket saan a nairanta a mangsakit a pisikal, no di ket, pananginsulto. Gapuna, ti kunkuna ni Jesus a ta no siasinoman ti mangpadpadas a mangsulbog kadakayo a makiapa wenno makisuppiat babaen man iti literal a panangtungpa iti ima wenno babaen kadagiti makainsulto a sasao, saanto a nasayaat ti ibabales.

Kalpasan ti panangipalagipna iti linteg ti Dios nga ayatem ti kaarrubam, kuna ni Jesus: “Ngem siak, kunak kadakayo: Itultuloyyo nga ayaten dagiti kabusoryo ket ikararaganyo dagiti mangidadanes kadakayo.” Iti panangitedna iti napigsa a rason iti panangaramid iti daytoy, innayonna: “[Tapno] annaknakayo ni Amayo nga adda sadi langit, ta paruarenna ti initna kadagiti dakes ken kadagiti naimbag.”

Pinagpatingga ni Jesus daytoy a paset ti sermonna babaen ti pammagbagana: “Agbalinkayo ngarud nga awan pagkuranganna, a kas ken Amayo a nailangitan nga awan pagkuranganna.” Di kayat a sawen ni Jesus a dagiti tattao ket agbalinda a perpekto wenno awan pagkuranganna iti naan-anay a kaipapananna. Imbes ketdi, mabalinda, babaen ti panangtuladda iti Dios, a palawaen ti panagayatda a ramanenna uray dagiti kabkabusorda. Ti umas-asping a salaysay ni Lucas ti nangilanad kadagiti sasao ni Jesus: “Agbalinkayo koma a manangngaasi, a kas ken ni Amayo a manangngaasi.” Mateo 5:17-48; Lucas 6:36.

◆ Kasano ti panangipakita ni Jesus iti nangato a panangmatmatna iti Linteg ti Dios?

◆ Ania a pannursuro ti inted ni Jesus tapno mairamutan dagiti pagtataudan ti pammapatay ken pannakiabig?

◆ Aniat’ kayat a sawen ni Jesus idi kinunana nga iparang ti bangir a pingping?

◆ Kasano ti intay panagbalin nga awan pagkuranganna kas ti Dios awan pagkuranganna?