Report dagiti Manangiwaragawag ti Pagarian
Dagiti Naisangsangayan a Kumbension Sadi Argentina
“DAGITI Saksi ni Jehova naadaldan ti agtataripnong nga awan ti kinaranggas wenno kinalulok, nga awan ti tabako wenno alkohol, nga awan ti aniaman a panaglablabes. Maysa a leksion, awan duadua, a maipaay iti kagimongan kas ti kagimongantayo, nga opisial a nainaig iti Katolisismo, ti kaskasdi nga addaan ti pakarigatan iti panangaywan iti dadakkel a taripnong kadagiti pagay-ayaman ti football nga awan aniaman a di panangikankano, a no maminsan agbalin a trahedia,” kuna ti magasin a Flash idiay Argentina. Daytoy a komento ti naaramid a mainaig iti maysa kadagiti uppat a “Manangsalimetmet Kinatarnawna” a Kumbension dagiti Saksi ni Jehova a naangay idiay Agrentina idi Enero 1986. Pudno unay, dagiti kakabsat maragsakanda a makakita iti 97,736 a timmabuno kadagiti uppat a kumbension. Maysa a naragsak nga okasion kadakuada ti kaadda ti ngangngani 600 kadagiti kakabsatda manipud 19 a dadduma a pagpagilian ken 5 a kontinente a timmabuno a kaduada. Nagragsakanda met, a maammuan a kadagiti 97,736 a timmabuno, agarup 40,000 dagiti kabbaro nga interesado.—Salmo 122:1.
Kinomendaran a naimbag dagiti pagiwarnakan dagiti kunbensionista gapu iti nagsayaat nga organisasion ken kababalinda. Ti pagiwarnakan a La Razon intampokna ti sumaganad maipapan iti kumbension idiay Buenos Aires a naangay idiay River Plate Stadium a sadiay nasurok a 57,000 ti timmabuno: “Urnos, kinadalus, ken ti nakadkadlaw a kinaulimek, dagiti pakailasinan . . . Ti itatabuno dagiti matalek impamatmatna ti naan-anay nga organisasion . . . urnos a natakkon a masarakan no maipapan iti umariwekwek.”
Ti pagiwarnakan a La Nacion ti nagkomento iti kumbension a naangay idiay Rosario a sadiay 15,000 ti timmabuno: “Agpapan pay ti adu a bilang dagiti tattao nga inawis dagiti Saksi ni Jehova, awan pay uray maysa a polis a makita iti aglawlaw, ket ti urnosda ti naan-anay.”
Inusar dagiti delegado ti isuamin a kita ti transportasion tapno makagteng kadagitoy a kumbension: eroplano, tren, bus, dagiti kotse; ken bisekleta. Nasurok nga 870 a bus ken maysa a tren ti naarkila a nangiyeg kadagiti delegado manipud idiay Rio Negro Valley iti abagatan ti pagilian a napan idiay kumbension iti River Plate. Maysa a tao nga interesado ti nagbisekleta iti uppat nga aldaw, iti 800 kilometro (500 mi), tapno tumabuno iti kumbension idiay Córdoba.
Apay amin daytoy a panagregget tapno tumabuno? Ngamin ta dagiti Saksi ni Jehova silalagipda unay iti naespirituan a kasapulanda. (Mateo 5:3) Ti pagiwarnakan a Clarin kunana: “Ti balakad, ti kanayon a pammagbaga, dagiti panangilawlawag ti Biblia, ti siaannad a sinursurot dagiti rinibo a lallaki ken babbai a, nagisursurat ti notas apaman a maisitar ti maysa a teksto ti Biblia, ukradenda ti Nasantuan a Kasuratan ket kitaenda ti naadaw a teksto.” Ti La Voz del Interior idiay Córdoba ti nagkuna: “Impaganetget ti asamblea ti pannakasapul ti panangammo no kasanot’ panangtungpal a naan-anay iti linteg ti Dios, uray pay kadagiti detalye kas ti panaglalangen, musika, ken personal a panagkawkawes.“
Kas panangipakita ti epekto dagiti impormasion a naiparang, maysa a lalaki kunana kalpasan ti panaglabas ti kumbension: “Manipud iti dayta nga aldaw [nga itatabuno iti kumbension], nagbalbaliwen a naan-anay ti panagbiagko. Nasaysayaaten ti pannakilangenko kadagiti kamkameng ti pamiliak. Nasaysayaaten ti panagtrabahok. Maragsakanak unay a maiyam-ammo kadakayo, a maammuak a kaskasdi nga adda pay met laeng dagiti naimbag a tattao iti aglawlaw, tattao a mangtultulong kadagiti kaarrubada gaput’ panagayatda ken Jesus. Dagiti babbai agkawesda a naemma, awan agsigsigarilio wenno agbarbartek. Maysa a pudno a paraiso, a nagadu dagiti tattao nga agsangsangkamaysa ken agtigtignay a kasda la maysa a dakkel a pamilia.”
Dagiti kakasta a komento ti makatulong kadatayo a mangapresiar a babaen laeng iti espiritu ni Jehova a posible ti kasta nga urnos ken panagayat.