Paritan ti Ubbing iti Panaggigimong?

‘REBBENG a di aw-awiten dagiti maladaga ken ubbing iti balay ti Dios.’ Kasta dagiti rikna ti agdindinamag a komentarista ti Biblia a ni Adam Clarke. Nupay kasta, nangted pammalubos kadagiti napanglaw nga ina nga ‘awan sabali a tao a mangaywan iti anakna bayat ti kaawanna.’ Dagita ti mapalubosan a mangiyeg kadagiti annakda idiay simbaan “nupay daytat’ di kumbeniente iti kongregasion, ken iti dadduma a ministro, a makangkangngeg iti ubbing nga agsangit.”

Imbatay ni Clarke ti panangkontrana iti ubing iti teksto ti Biblia idiay Nehemias 8:2, a mabasa: “Ket ni Esdras a padi inyegna ti linteg iti sango ti gimong dagiti lallaki man ken babbai nga agpadpada ken amin a nakabalin a dumngeg a makaawat.” Nupay kasta, ti kasta nga interpretasion suppiatenna ti espiritu ti Deuteronomio 31:12: “Ummongemto dagiti tattao, dagiti lallaki ken babbai ken dagiti ubbing . . . tapno mangngeganda ken makasursuroda.”​—Kitaenyo met ti 2 Timoteo 3:15.

Gapu itoy, saan nga agparang nga iti panangiyurnos iti daytoy a miting pampanunoten ni Nehemias ti panangilaksid iti asinoman. Imbes ketdi, ti ranta ti imbitasion awan duadua isu ti panangiraman kadagiti amin a “makabalin a dumngeg a makaawat,” tapno paregtaen ti naan-anay a pannakipaset! Anian a di koma nainkalintegan ti panangikalikagum kadagiti nagannak a panawan dagiti annakda nga awan ti mangas-asikaso!

Makapainteres, dagiti Saksi ni Jehova itatta maparparegtada a mangikuyog kadagiti maladaga ken annakda kadagiti Nakristianuan a panaggigimong. Pudno, a no maminsan mabalin a dagitoy ti makapataud iti menor a pakariribukan ken mangted pagdukotan kadagiti nagannak. Ngem dagiti Kristiano a nagannak pagreggetanda a sanayen dagiti annakda nga agtugaw a siuulimek. Inton agangay dagiti annakda ket agbalindanto met a “makabalin a dumngeg a makaawat” ket maipaunegdanton dagiti makaited-biag nga impormasion.​—Hebreo 10:24, 25.