Ti Kangatuan a Persona ti Naisalsalumina

TI KANGATUAN A PERSONA. Mamatikayo aya kenkuana? Agpapan pay iti nasaknap a panagikay manipud kadagiti relrelihion iti adu a dagdaga, minilmilion ti kaskasdi a mamati pay iti kabibilgan, naayat a Persona nga isut’ mabalinda a taliawan, nangnangruna no addada iti panagdukot.

Kas pangarigan, idiay Africa nagadu dagiti lokal, nakaiyugalian a relihion a dakkel ti panagdudumada iti maysa ken maysa ken agdaydayaw kadagiti didiosen nga adu ti nagnaganda. Kaskasdi, kaaduan a tattao ti sititibker a mamati iti maysa a Kangatuan a Persona nga isu ti “naisalsalumina” ken “mangiturturay a naan-anay iti uniberso.”

Kas naisalaysay iti libro ni Dr. Peter Becker a Tribe to Township, maysa a lakay a Sotho a manangaskasaba idiay Sud Africa ti nagkuna: “Ti lakayen nga amak ken ti amana . . . ammoda ti maipapan iti Dios, ti Molimo, nabayagen sakbay ti idadateng dagiti misionero, Dios nga isu ti Kangatuan a Persona a namarsua kadagiti isuamin a bambanag . . . Adda aya pakaidumaanna no dakami [dagiti Basuto] awaganmi ti Dios, ti Molimo, dagiti Zulu, Nkulunkulu, dagiti Xhosa, Thixo . . . ?”

Siempre, ti kinaadu dagiti nagnagan ti makariribuk. Awan duadua nga umanamongkayo a ti maysa a sapasap a Dios ket isu met laeng iti amin a tattao ken rebbeng a maaddaan iti sapasap a nagan. Ti napaltiingan a koleksion dagiti kadaanan a sursurat, ti Biblia, ti mapagraraeman iti intero a globo. Kuna dayta: “Bareng maammuanda koma a siksika laeng, nga agnagan Jehova, ti Kangatuan a ringbawam ti amin a daga.” (Salmo 83:18) Gapuna, sigun iti Biblia, ti Kangatuan a Persona ti addaan ti naisalsalumina a nagan.

Ania a kita ti Persona daytoy maysa a Dios, kas ipanayag ti Biblia? “Ta amin a dalanna kinalinteg”; “Dios a manangngaasi ken managparabur, nainayad nga agpungtot ken aglaplapusanan iti naimbag nga ayat ken kinapudno”; “napno iti ayat ken manangngaasi”; “ti Dios, saan nga iti riri, no di iti talna”; “ti Dios isu ti ayat.”​—Deuteronomio 32:4; Exodo 34:6; Santiago 5:11; 1 Corinto 14:33; 1 Juan 4:8.

Ti Biblia ipanayagna met ni Jehova kas ti maymaysa a rebbeng a dayawen. Wen, gapu ta isu ti naisalsalumina, nainkalintegan ti panangikalikagumna ti naipamaysa a debosion. (Exodo 20:5) Kuna ni Jesu-Kristo: “Agdaydayawka ken ni Jehova a Diosmo, ket isu laeng ti pangipaayam ti sagrado a serbisio.”​—Mateo 4:10.

Agpapan pay kasta, kaaduan nga Africano, nupay ibagbagada a mamatpatida iti maysa a Kangatuan a Persona, agdaydayawda kadagiti adu a didiosen. Saan kadi a kasla isingasing dayta ti sumagmamano a pannakariro maipapan iti pakabigbigan wenno kababalin ti Dios? Ngem uray pay iti kaaduan a paset ti Kakristianuan, ti naglawag, nagtan-ok, a persona ti Dios ti mapalibeg babaen iti panangibilang kenkuana a kas maysa a tallo a Dios. Mabalin a nangngeganyo daytoyen kas ti Santisima Trinidad, maysa a sursuro a misterioso ken narigat a maawatan. Kas pangarigan, ti polieto a The Blessed Trinity kunaenna: “Ti sursuro ti Santisima Trinidad . . . ket maysa a misterio . . . Daytat’ saan a mapaneknekan babaen iti panagrason . . . Saan a mapaneknekan a posible.”a (Kukuada ti italiko.) Innayon pay ti polieto: “Ngarud, ti pammaneknek, iti maysa a misterio buklen iti panangipakita a daytat’ linaon ti paltiing, ti Nasantuan a Kasuratan.”

Ngem pudno kadi nga isursuro ti Nasantuan a Kasuratan daytoy a doktrina? Ti kadi Kangatuan a Persona ti tallo a persona iti maymaysa a Dios?

[Dagiti Footnote]