Report dagiti Manangiwaragawag ti Pagarian
Dagiti Agbasbasa nga Annak dagiti Saksi Nakomendaranda
KAS maysa nga estudiante idiay eskuelaan, mababainkayo aya nga agsao maipaay iti pammatiyo? Dagiti kapadasan iti baba ipanayagna no kasano a dagitoy agtutubo a Saksi saanda nga agbuteng a mangitandudo ti Nakristianuan a pammatida ket nakomendaranda iti panangaramidda iti dayta.
◻ Iti maysa nga eskuelaan idiay Australia, natudingan dagiti estudiante nga agsurat iti salaysay maipapan iti Krismas, ngem kuna ti mannursuro iti 11-años a Saksi: “Ammok a maysaka kadagiti Saksi ni Jehova, gapuna saanka a makapagsurat maipapan iti panangrambak iti Krismas. Mabalinmo ti agsurat iti naiduma a salaysay maipapan iti ‘Historia ti Krismas.’” Inaramid ti agtutubo a kabsat a babai ti salaysay, a nagusar kadagiti maiyanatup nga impormasion manipud kadagiti publikasion ti Sosiedad ken dadduma pay a reperensia. Iti panagsiddaaw ti klase, ti mannursuro ti nagkomento a ti impormasion ti nakasaysayaat ken apagpag-isu sigun iti historia. “Kadagiti amin a salaysay nga inawatko, ti salaysaymo ti kasayaatan iti klase,” kuna ti mannursuro. Kas resultana, ti agtutubo a Saksi ti nakaipaima ti School a broshur, 15 a magasin, maysa a libro a Kinaagtutubo, ken dua a libro nga Agbiag nga Agnanayon iti mannursurona ken kadagiti padana nga estudiante.
◻ Iti sabali pay nga eskuelaan idiay Australia, walo nga annak a Saksi ti inaywanan ti nangisuno a mangisursuro iti kada malem iti maudi a tallo a lawas ti panageskuela, agsipud ta saanda a nakiraman kadagiti ar-aramid ti Krismas. Ti maestra iti kamaudiananna nagkomento iti ina ti maysa kadagiti ubbing: “Ti pasetko ket nakabasbassit laeng. Adu kadagiti mannursuro ti simrek ken nagsaludsod no kumosta dagiti bambanag. Ket kunak kadakuada: ‘Awan kuentana no aniat’ pampanunotenyo maipapan ti relihionda ken ti panagkitakitda manipud kadagiti dadduma nga ar-aramid, daytoy pay laeng ti kasayaatan a grupo dagiti ubbing a nakalangenko.’” Sumagmamano a lawas kamaudiananna idi isut’ nasarakanda iti ministerio a panagbalay-balay, kuna ti maestra: “Imbagam met laeng aya dagiti banag a nasaok maipapan kadagiti ubbing idiay eskuelaan? Kayatko a tunggal maysa ti makaammo.”
◻ Manipud Estados Unidos immay daytoy a kapadasan ti maysa a 17-años a senior iti high school a nakakita a ti klasena iti linteg naigamer iti maysa a diskusion maipapan kadagiti kalintegan a mainaig iti wayawaya iti relihion ken ti panagsina ti Simbaan ken ti Estado. Dua kadagiti kaso ti nakairamanan dagiti Saksi ni Jehova ken ti isyu maipapan iti dara. Nakita ti agtutubo a kabsat a babai a ti report a mapagsasaritaan ket maysa a dasig laeng ti salsalaysayenna ket dina inkalintegan ti maipapan kadagiti kinapudno ti Biblia maipapan ti dara ket imbagana dayta iti maestro. Ti maestro simmungbat kenkuana a nangited gundaway ti panagsaona iti klase. Sakbay ti panagpalawagna, patien dagiti estudiante a dagiti korte ti nangaramid ti umiso a pangngeddeng iti panangpilit kadagiti Saksi a maaddaan ti panangiyalison iti dara a maikontra iti pagayatanda. Ngem kalpasan ti pannakangngegda iti naibatay-Biblia nga argumento, ti klase ti bimmutos a sangsangkamaysa kontra kadagiti pangngeddeng ti korte. Maragsakan ti kabsattayo a babai idi adu kadagiti estudiante ti immasideg kenkuana ket nagdawat iti ad-adu pay nga impormasion maipapan iti pammati dagiti Saksi ni Jehova. Itan kunana nga ad-adda nga apresiarenna a naan-anay a ti eskuelaan ket isu ti naisangsangayan a teritoriana.
Wen, dakayo nga agtutubo nga adda iti eskuelaan addaankayo iti naisangsangayan a teritoria. Bayat nga addaankayo iti gundaway, siaayat a tulonganyo dagiti padayo nga estudiante a makaadal kadagiti makaay-ayo a panggep ti Dios, ket makomendarankayto saan laeng a manipud kadagiti dadduma no di ket manipud ken ni Jehova a mismo!—Job 40:14.