Report dagiti Manangiwaragawag ti Pagarian
Bembendisionan ni Jehova dagiti Manangsalimetmet Kinatarnawna Idiay Cyprus
KUNA ni Jesus kadagiti paspasurotna: “No indadanesdak, idadanesdakayto met.” (Juan 15:20) Ket ni Jehovah, babaen iti mammadtona a ni Isaias, nupay kasta, kunana: “Awan ti igam a naaramid a maibusor kenka a rumang-ayto.” (Isaias 54:17) Dagitoy a sasao agpadpadada a pimmudno idiay Cyprus, a sadiay dagiti manangsalimetmet kinatarnawna a Saksi ni Jehova ti nagagetda a mangikaskasaba ti naimbag a damag.
◻ “Ti Greek Orthodox Church nakaak-aktibo unay a mangpadpadas a mangpakapuy iti trabahotayo,” kuna ti report a naggapu iti dayta a daga. “Dagiti papadi agiwarwarasda kadagiti polieto a mangak-akusar kadatayo iti isuamin a kita dagiti bambanag ken ibagbagada kadagiti tattao a liklikanda ti pannakisarsarita kadagiti Saksi ni Jehova. Bumisitada pay kadagiti tattao a makipagad-adal ti Biblia kadagiti Saksi ken padpadasenda a paayen ida. Idiay Paphos, maysa a padi a teologo ti nangpadpadas a mangkumbinsir ti tallo a nagduduma a tattao a sardengandan ti pannakipagad-adalda ti Biblia kadagiti Saksi ni Jehova. Kadagiti nagduduma nga okasion, tunggal maysa kadagiti tallo ti nangawis ti maysa a kabsat a sumango iti daytoy a teologo. Siraragsak, amin dagiti tallo ti siaaktibo itan a makitimtimpuyog iti organisasion ni Jehova.” Daytoy, siempre, ti namagpungtot iti padi, a nagkomento: “Diakto pulosen makisarsarita kadagiti Saksi ni Jehova.” Dadduma kadagiti papadi ti nadandanonda pay a nangkabil kadagiti kakabsat bayat a makipaspasetda iti ministerio. Masansan, nupay kasta, ti panagregget dagiti klero ti agbalandra, ket ad-adu a tattao itan ti mangal-ala iti takderda a maipaay ken ni Jehova.
◻ Ti sumaganad a kapadasan manipud Cyprus ti mangipakita a ti panangsalimetmet ti kinatarnaw iti sidong ti ibubusor mangiyeg kadagiti bendision. Ti asawa ti maysa a babai ti natay bayat ti gubat idi 1974, nga isu ti nangpanaw kenkuana nga addaan maysa a bassit nga anak a babai a padakkelen. Ti babai ti nagasawa manen. Gaput’ pannakariribukna iti kinamanaginsisingpet ti klero ken ti kinaawan namnamana iti masanguanan, immanamong a makipagadal ti Biblia kadagiti Saksi ni Jehova. Sipapardas a rimmang-ay ket rinugianna metten nga ibagbaga kadagiti kakabagianna dagiti naimbag a bambanag a maad-adalna. Nangrugi ti ibubusor. Ti kadakkelan a suot immay idi ti 15-años nga anakna a babai ti nagkuna: “Napukawkon ni tatangko, ket no dika sardengan ti pannakiad-adalmo kadagiti Saksi ni Jehova, tallikudankanto metten nga inak. Agbalinakton nga ulila.” Nupay kasta, nagtultuloy a nakipagadal ti babai.
Maysa nga aldaw ti ubing a babai bimmisita iti gayyemna idiay ospital. Iti sumaganad a katre ti ospital, maysa a Saksi ti immay a kumita iti kabagyanna idi maysa a padi ti immay a mangkita iti isu met laeng a pasiente. Maysa a panagpatang ti nangrugi iti maysa a kabsat a lalaki ken ti padi. Ti kabsat a lalaki ti kalmado ken nataktika, nga inus-usarna ti Biblia a mangilawlawag ti takderna. Ti padi, iti kasumbangirna ti agresibo. Impangatona ti timekna, ngem uray naminsan saanna a linukatan ti Biblia. Ti balasitang ti nangbuybuya iti napasamak ket nasdaawan iti kinamanangngaasi ti kabsat a lalaki ken ti banag nga isut’ nagusar ti Biblia. Iti dayta met laeng a rabii, idi ti kabsat ken ti asawana bimmisita ken nanangna a maipaay iti panagadal ti Biblia, inlawlawag ti babai no aniat’ napasamak idiay ospital ket indawatna kadakuada: “Mabalinyo met aya ti makipagadal kaniak?” Itan ti babai ti makipagad-adal a mamindua tunggal lawas ket makipagad-adal met ni lakayna. Ti ina maysan a nabautisaran nga agibumbunannag.
Pudno unay, ni Jehova bendisionanna dagiti mangsalimetmet kinatarnawna nga ad-adipenna idiay Cyprus!
[Ladawan iti panid 7]
Nabusor met ni apostol Pablo idiay Paphos