Ti Biag ken Ministerio ni Jesus

Sinangaili ti Prominente a Fariseo

NI JESUS ti sangaili idiay balay ti maysa a prominente a Fariseo, a sadiay kalkalpas a pinaimbagna ti maysa a lalaki nga agsagsagaba iti panagebbal. Itan, idi napaliiw ni Jesus dagiti padana a sangaili nga agpilpili kadagiti prominente a luglugar idiay panganan, isut’ nangisuro ti maysa a leksion iti kinapakumbaba.

“No adda mangawis kenka iti pagbodaan,” imbalakad ni Jesus, “saanka a tumugaw iti nagundawayan a tugaw. Di la ket ta adda nataktakneng ngem sika nga inawisna, ket inton umay daydiay nangawis kenka ken isu, kunaennanto kenka, ‘Itedmo iti daytoy ti tugaw.’ Ket itinto kasta agin-inutkanto a sibabain a tumugaw iti kutit.”

Gapuna impatigmaan ni Jesus: “Ngem inton maawiska, inka ket agtugawka iti kababaan a saad, ta inton umay ti nangawis kenka kunaennanto, ‘Gayyem, umaliska iti nangatngato.’ Itinto kasta addanto dayawmo kadagiti makisango kenka iti panganan.” Ket kas panangipaganetget iti leksion, nagpatingga ni Jesus: “Ta amin a mangitanokto iti bagina maipababanto ket ti agpakumbaba maitan-okto.”

Sumaganad, kinasao ni Jesus ti Fariseo a nangawis kenkuana ket insalaysayna no kasanot’ panangisagana ti pannangan nga adda pudpudno a pategna iti Dios. “No agaramidka ti pangaldaw wenno pangrabii, dika awisen dagiti pagayammo wenno uray dagiti kakabsatmo wenno uray dagiti kakabagiam wenno uray dagiti kaaruba a nabaknang. Di la ket ta awisendaka met ket supapakandaka. Ngem no agaramidka ti dayá, ayabam dagiti napanglaw, dagiti pawad, dagiti pilay, dagiti bulsek; ket naragsakkanto, ta awan ti maisupapakda kenka.”

Ti panangisagana ti kasta a pannangan para kadagiti daksanggasat ti mangyeg ragsak iti mangipapaay iti dayta agsipud ta kas inlawlawag ni Jesus iti manangsangailina: “Ta magunggonaankanto inton panagungar dagiti nalinteg.” Ti panangisalaysay ni Jesus iti daytoy makagunggona a pannangan ti nangipalagip iti padana a sangaili iti sabali pay a pannangan: “Naragsak ti manganto ti tinapay idiay pagarian ti Dios,” kuna daytoy a sangaili. Kaskasdi, di amin ket impatpategda dayta naragsak a panginanamaan, ta intuloy nga impakita ni Jesus dayta iti pangngarig.

“Maysa a tao nagaramid ti dakkel a pangrabii ket nangawis ti adu. Ket. . . imbaonna ti adipenna a nagkuna kadagiti naawis, ‘Umaykayo, ta adda a naisagana aminen.’ Ket isuda amin nangrugida a nagpambar a naggigiddan. Ti umuna kinunana kenkuana, ‘Gimmatangak ti maysa a talon ket masapulko ti umaway ken kitaen daydiay; dawatek kenka, Ipakawannak.’ Ket kinuna ti maysa, ‘Gimmatangak ti lima a pagasawaan ti baka ket innak ida padasen; dawatek kenka, Ipakawannak.’ Ket kinuna ti sabali, ‘Kakaskasarko ket gapu itoy saanko a mabalin ti umay.’”

Anian a nagkapuy a pampambar! Ti maysa a talon wenno dagiti baka ket gagangay a kitaen a sukimaten sakbay a magatangda, gapuna awan ti talaga a kinaganat a mangkita kadakuada kalpasanna. Umas-asping iti dayta, ti panagboda ti maysa a tao ti di rebbeng a manglapped kenkuana iti panangakseptar iti importante nga imbitasion. Gapuna idi mangngegna ti pampambarda, nakapungtot ti apo ket imbilinna iti adipenna:

“‘Rummuarka daras kadagiti daldalan ken kadagiti lanlansangan iti siudad, ket iyegmo ditoy dagiti napanglaw ken dagiti pawad ken dagiti bulsek ken dagiti pilay.’ Ket kinuna di adipen, ‘Apo, naaramid kas imbilinmo, ket adda pay laeng yan.’ Ket kinuna di apo iti adipen, ‘Rummuarka kadagiti daldalan ken kadagiti inal-aladan, ket ipapilitmo a sumrekda tapno mapno ti balayko. . . Awan kadagiti tattao a naawis ti makaramanto iti pangrabiik.’”

Ania a kasasaad ti iladladawan ti pangngarig? Bueno, “ti apo” a mangisagsagana ti pannangan irepresentarna ni Jehova a Dios; “ti adipen” a mangiyaw-awat ti imbitasion, isu ni Jesu-Kristo; ket ti “dakkel a pangrabii,” isu dagiti gundaway a makilinea iti Pagarian dagiti langlangit.

Dagidiay immuna a nakaawat ti awis nga umay makilinea iti Pagarian ket, nangnangruna kadagiti isuamin, dagiti narelihiusuan a papangulo a Judio idi kaaldawan ni Jesus. Nupay kasta, inwaksida ti awis. Gapuna, mangrugi nangnangruna idi Pentecostes 33 K.P., naited manen ti maikadua a panangawis kadagiti mauy-uyaw ken nanumo a tattao iti nasion a Judio. Ngem awan imdas a nangpunno iti 144,000 a yan iti nailangitan a Pagarian ti Dios. Gapuna idi 36 K.P., tallo ket gudua a tawen iti kamaudiananna, ti maikatlo ken maudi nga awis ti naidanon kadagiti di nakugit a di Judio, ket ti pannakaurnong dagita ti nagtultuloy agingga iti maika-20 a siglo. Lucas 14:1-24.

◆ Ania a leksion iti kinapakumbaba ti insuro ni Jesus?

◆ Kasano a ti maysa a manangsangaili makapagsagana ti pannangan nga adda pategna iti Dios, ken apay a daytat’ mangyegto ti ragsak kenkuana?

◆ Apay a ti pampambar dagiti naawis ket nakapuyda?

◆ Aniat’ irepresentar ti pangngarig ni Jesus maipapan iti “dakkel a pangrabii”?