Nakagtengda iti Puso

Maysa nga ina manipud, E.U.A. nagsurat: “Addaankami iti lima ti tawenna nga anak a lalaki, ni Keith. Iti kastoy a tukad iti kinaagtutubona, saan unay a relihiuso. Daytoy dina kayat a sawen nga isut’ saan a nasingpet nga ubing. Isut’ managayat ken naasi ket umimdeng a buyogen ti konsiensiana. Ngem gagangay a dina ikankano ti kaaduan a panangikagumaan a pannakisarita iti Biblia wenno dagdagus a baliwanna ti tema. Gapuna ikarkararagmi a maipaay ti anus ken panangsapul kadagiti dadduma a pamay-an a mangipasagepsep kadagiti naespirituan a kinapudno iti naganus unay a pusona.

“Ti ubing a lalaki nakapatauden iti kasta unay a panagayat kadagiti estoria. Simrek ti libro nga Estoria ti Biblia ket simmaganad dagiti tapes. Inikkan ti lolana ti cassette player. Impakitami kenkuana no kasano ti panangusar iti dayta. Itan kadagiti adu nga or-oras iti maminsan, isut’ agtugawen nga iggemna ti libro, a sursurotenna dagiti tapes.

“Ti tiempo ti pannaturog ditoy ket gagangayen a tiempo iti estoria. Ita a rabii kinunak a nabannogak unay, ngem nalabit mabalin a kayatna ti mangisalaysay iti maysa. Kinalikagumak ti maysa nga estoria ti Biblia. Panunotenyo laengen ti ragsakko idi rinugianna nga ibaga kaniak ti maipapan ken ni Job, kalpasanna ni David ken ni Goliat, kalpasanna ni Ruth ken ni Noemi. Idi nakagteng iti paset a sadiay inayat unay ni Ruth ni Jehova, isut’ nagagaran ket kinunana, ‘Daytat’ paboritok a paset!’

“Adda nainayon pay a bendision idi nabigbigko a tultuladenna pay ti tuno, ti puntuasion, ken masansanayna ti nasayaat a diction! Ket adawenna dagitoy nga estoria a sao por sao! Agyamanak, agyamanak, agyamanak!”

Kinapudnona, maysa nga agtutubo malagipna ti ad-adu pay ngem ti pagarupyo no isut’ addaan ti interes. Adu a pamilia ti nakasarak a kasapulan laeng Ti Librok dagiti Estoria ti Biblia, agraman ti recording ti libro kadagiti cassette tapes, a mangtignay iti dayta nga interes. Mabalinyo ti umawat kadagiti cassette tapes wenno ti tomo Ti Librok dagiti Estoria ti Biblia, wenno dagiti dua, babaen laeng ti panangsurat ken panangibuson iti naipakuyog a kupon.

Kur-itanyo ti maysa wenno dua kadagiti sumaganad, ket ipatulodyo ti umiso a kontribusion:

[ ] Pangngaasiyo ta mangipatulodkayo, nabayadanen ti seliona, ti kolor-kape vinyl nga album nga addaan iti uppat a cassette tapes Ti Librok dagiti Estoria ti Biblia (iti Ingles laeng). Mangisapitak iti ₱120. (Iti ruar ti Filipinas, agsurat iti lokal a sanga iti Watch Tower a maipaay iti presio.)

[ ] Pangngaasiyo ta mangipatulodkayo ti nailadawan a 256-panid a Ti Librok dagiti Estoria ti Biblia, isu a nangisapitak iti ₱42.