Report dagiti Manangiwaragawag ti Pagarian
‘Umaydanto dagiti Napateg a Gameng’
INSURAT ni mammadto a Haggeo dagitoy a sasao idi 520 K.K.P.: “‘Ket pagkintayegekto dagiti amin a nasnasion, ken dagiti napateg a gameng dagiti amin a nasnasion umaydanto; ket pusekekto daytoy a balay iti kinadayag,’ kuna ni Jehova dagiti buybuyot.” (Haggeo 2:7) “Dagiti napateg a gameng” dagiti amin a nasnasion a mangpunno iti balay ni Jehova iti kinadayag isuda dagiti managbuteng-Dios a managdaydayawna. Dagita a nasingpet-panagpuspusona a tattao ti mangab-abrasa ti naimbag a damag idiay Italia, a gapu itoy adda itan 166,000 a Saksi a mangisursuro kadagiti tattao ti Biblia iti dayta a nasion. Ibilbilang dagiti Katoliko a klero ti naisangsangayan a panagdakkeltayo kas “nakakigkigtot a banag” a “mangaburido ken mangpaladingit” kadakuada. Bay-anyo a ti maysa nga agsapsapul ti kinapudno sadiay ti mangisalaysay no aniat’ napasamak kenkuana.
“Maysaak a katekista iti sangapulo a tawen, ket kumbinsidoak a daytoy ti wagas a panangiyebkas ti ayatko iti Dios ken kadagiti kaarrubak. Nupay adda gayyemko a maysa kadagiti Saksi ni Jehova, diak pulos inwayaan ti dumngeg iti mensahe ti Biblia. Iti napalabas a sumagmamano a panawen, nupay kasta, no sumarungkar dagiti Saksi kaniak, paspastrekek ida. Kayatko nga ibaga kadakuada a saandan sarsarungkaran ni katugangak a baket, ta ad-adda a mariribukan. ‘Imbes a bisbisitaen dagiti natataengan,’ ibagak kadakuada, ‘makisaritakayo kadagiti tattao kas kaniak.’ Manipud idin regulardan nga um-umay iti balayko, ngem tunggal adda madukitda a doktrinal a punto, kalikagumak nga itantanda ti tungtongan agingga a makapagsukimatak iti dayta a banag.
“Nakisaoak iti sumagmamano a padi ket nakitak nga awan sungbatda manipud iti Biblia. Maysa kadakuada, a misionero, ti nagkuna kaniak a saan a talaga a nasken ti mapmapan iti Misa. ‘Tutal,’ kunana, ‘kadagiti pagilian kas ti Brazil, kas pangarigan, agar-aramid dagiti tattao ti sabsabali a bambanag imbes a mapan iti Misa. Ti importante a banag ket isut’ panagserbi iti Dios aginggat’ kabaelan ti maysa.’ Dagitoy a sasao ti nangpapigsa kaniak a gupden ti pannakisinggalutko iti Iglesia Katolika. Ti sabali pay a padi ti nagkuna ken lakayko, a maysa met idi a Katoliko, a no kayatko ti agbalin a maysa kadagiti Saksi ni Jehova, palubosannak latta agsipud ta dagiti Saksi ni Jehova ti addaan maymaysa a biddut, isu ti kinaregtada unay. Kababautisarko pay laeng iti nabiit kadua ti maysa kadagiti annakko a lallaki. Ni lakayko ti makipagad-adalen ti Biblia ken mangipakpakitan ti interes iti mensahe ti Pagarian.”
Bayat a kinkintayegen ni Jehova dagiti nasnasion babaen ti panangiwaragawagna kadagiti panangukomna iti intero a daga, adu kadagiti nalinteg pagannayasanda a tattao ti mangpampanaw kadagiti nakillo nga ar-aramid tapno surotenda dagiti prinsipio ti Biblia. Sakbay a naammuanna ti kinapudno, maysa a lalaki nga Italiano ti immutang ti dakkel unay, a pampanunotenna a mabayadanna ti utangna babaen iti kuarta nga agtaud iti regular a sueldona ken kadagiti sinusuitik a “tips” nga aw-awatenna. Idi magun-odannan ti pannakaammo ti kinapudno, isut’ nangaramid iti nagrigat a desision ket insardengnan nga aw-awaten dagiti sinusuitik a “tips.” Isu ken ni baketna ti nabautisaran ket dagus a rinugianda ti agserbin iti amin-tiempo a ministerio. Idiay ospital a pagtartrabahuanna, masansan a labusanna dagiti bangkay, ket masansan dadakkel a kantidad ti kuarta ti masarsarakanna kadakuada. Kas pangarigan, naminsan nakakita ti 150,000 a lira (agarup $115), ken iti naminsan pay 600,000 a lira (agarup $460). Gapu ta isut’ mapagtalkanen, insublina ti kuarta, ket daytoy ti nangted kenkuana ti gundaway a makapagsao kadagiti administrador ti ospital ken kadagiti doktor maipapan iti kinapudno. Ti manangimaton ti ospital ti nangipatulod kenkuana kadagiti sursurat ti komendasion gapu iti nadalus ken responsable a kababalinna.
Dagitoy a kapadasan manipud Italia ket pangsampolan laeng no kasano a “dagiti napateg a gameng” ket pampanawandan daytoy nadangkes, narungsot a sistema ket um-umaydan iti nadalus, natalna nga organisasion ni Jehova sakbay a kintayegenna ti napolitikaan a sistema ni Satanas nga agturong iti pannakadadael inton Armagedon.