Agtultuloy ti Panangidadanes Idiay Burundi

IDI karrugi ti 1989, dagiti agtuturay ti sentral a nasion ti Africa a Burundi imbulosda ti allon ti panangidadanes kadagiti Saksi ni Jehova. Kas naipakaammo iti Agosto 15, 1989 a bilang Ti Pagwanawanan, pinadpadas dagiti agtuturay a piliten dagiti Saksi a tallikudan ti pammatida, nga inusarda ti panangriribuk, panangarestar, panangkabkabil, ken dadduma pay a nadamsak a pamay-an. Ania ngay ti kasasaad nanipud idin?

Maysa pay a report manipud Burundi ti nagkuna a bayat ti bisita ti manangaywan ti distrito idiay Kinyinya ken Gitega, pinadpadas dagiti agtuturay nga arestuen dagiti miembro ti kongregasion bayat ti maysa a gimong. Nakatalaw dagiti manangaywan ti sirkito ken distrito, ngem dagidiay naaresto ramanenna ti dua nga estudiante ti haiskul ken maysa a babai nga agad-adal iti primaria. Nakabkabilda amin. Iti sumaganad nga aldaw dagiti Saksi a naaresto nagparangda iti sanguanan ti gobernador ket inlawlawagda no apay saanda a mabalin ti agmiembro iti partido politika. Nakabkabilda manen kalpasanna. Dadduma a report ti nangipadamag kadagiti umas-asping a pasamak.

Maysa a responsable a panglakayen a Kristiano idiay Burundi ti nagsurat: “Awan Saksi ni Jehova a naar-aresto gaput’ panagtakaw, panangpapatay, wenno pananglaban ti gobierno. No adda pudpudno a pangibatayan dagiti agtuturay a pangdusaan kadagiti Saksi, bay-an nga aramidenda koma dayta kadagiti silulukat a pangukoman imbes a kabkabilen dagiti natalna nga umili, nga agawen dagiti sanikuada, ken kamkamaten ida kas atap nga an-animal. Adu a kakabsat kadagiti sursurong ti napilitan a mangpanaw kadagiti pagtaenganda ket agbibiagda a kasla pugante. Maysa a sister a ti lakayna ket adda iti pagbaludan nakapanen kadagiti adu nga agtuturay iti panagreggetna a mawayawayaan ni lakayna. Isut’ pinagtalawda amin babaen iti sungbat a: ‘Dikam pulos maibulos ni lakaymo bayat nga umaw-awatka ti kuarta manipud ballasiw-taaw tapno rippuogen ti pagiliantayo.’ Anian a panangpardaya!”

Nupay kasta, adda naimbag a damag manipud Burundi. Dagiti Saksi sadiay ket saanda a napabutngan wenno pabutbuteng. Siaannad ngem sipupudno nga agsaksaknap ti pannakaikaskasaba ti naimbag a damag, ket bigbigen dagiti kakabsat a lallaki ken babbai a babaen iti naan-anay a panagtalekda ken Jehova, makapagibturda. Adu a sursurat a mangiyeb-ebkas iti ibubusor ti naisursuraten ken naipatuloden idiay Burundi, ket awan duadua nga adu pay ti sumaruno inton mabigbig ti lubong nga itultuloy ti Burundi ti awan-asina a kampania ti panangidadanes kadagiti Saksi ni Jehova.

[Kahon iti panid 15]

Ti direksion ti presidente ti Burundi ket:

His Excellency

Major Pierre Buyoya

President of the Republic of Burundi

Bujumbura

REPUBLIC OF BURUNDI