Maysa a Pasken a Dikay Palpalabsen

“Itultuloyyo nga aramiden daytoy a panglaglagip kaniak.” Dagidiay a sasao ni Apotayo a Jesu-Kristo, a masarakan idiay Lucas 22:19, naiyebkasda idi tiempo nga inrugina ti pananglaglagip iti ipapatayna. Ti ipapatay ni Jesus linuktanna iti sangatauan ti namnama a makagun-od ti biag nga agnanayon iti paraiso a kasasaad. Gapuna ti ipapatayna ket maysa a banag a masapul a laglagipentayo. Ngilinenyonto aya ti pananglaglagip iti dayta iti daytoy a tawen?

Pangaasiyo ta awatenyo daytoy nga imbitasion manipud kadagiti Saksi ni Jehova tapno makikaduakayo kadakuada iti pananglaglagip iti daytoy napateg nga okasion. Daytoy ket maangayto kalpasan ti ilelennek ti init iti petsa a katupag ti Nisan 14 iti kalendario ti Biblia a naibatay iti bulan. Markaanyo ti petsa iti kalendarioyo tapnon dikay malipatan. Daytat’ Abril 10, 1990. Dagiti lokal a Saksi ni Jehova maibagada kadakayo ti eksakto a lugar ken oras a pannakaangayna iti lugaryo.