Malagipyo Pay Aya?

Nasarakanyo aya a dagiti nabiit pay a bilang Ti Pagwanawanan ket praktikal pategda kadakayo? Ngarud apay a dikay suoten ti memoriayo kadagiti sumaganad?

◻ Aniat’ masapul nga aramidentayo no kayattayo a matungpal ti panagkaykaysa ken kinatalna dagiti tattao iti amin a rasa a nasirmata idiay Isaias 2:4?

Umuna, rebbeng a bigbigentayo a ti Namarsuatayo, a ni Jehova, ti addaan kalintegan a mangisuro kadatayo “ti daldalanna.” Ken maikadua, masapul a maaddaantayo ti napasnek a tarigagay a makikumporme iti linlinteg ti Dios babaen iti panagkuna: “Magnatayonto iti dalanna.” (Isaias 2:2, 3)​—12/15, panid 5, 6.

◻ Apay a di maupay ken lumdaang dagiti Saksi ni Jehova iti sangalubongan a gura ken ibubusor kadakuada?

Impadto ni Jesus a ti kasta nga ibubusor ken gura agbalinto a pakailasinan a tanda dagiti pudno a managdaydayaw. (Juan 15:20, 21; 2 Timoteo 3:12) Gapuna naipasiguro kadagiti manangiwaragawag ti naimbag a damag nga addaandat’ nadiosan nga anamong. Mainayon pay, ammo dagiti Saksi ni Jehova nga addaandat’ tulong ti Kangatuan a Dios, nga isu ni Jehova.​—1/1, panid 12.

◻ Aniat’ sumagmamano a pamunganayan a pagalagadan a masapul nga intay maragpat tapno masungbatan ti karkararagtayo?

Masapul a patientayo a sipapasnek ti kaadda ti Dios. Rebbengtay ti “sipapasnek a mangsapul kenkuana,” nga agtalek a gunggonaanna dagidiay mangaramid iti kasta. (Hebreo 11:6) Kasta met, masapul nga umadanitayo ken Jehova baeten ken Jesu-Kristo ken isu laeng. (Juan 14:6, 14)​—1/15, panid 4, 6.

◻ Ania ti “nadiosan a debosion”? (1 Timoteo 3:16)

Ti nadiosan a debosion ket isut’ panagraem, panagdayaw, ken panagserbi iti Dios, a buyogen ti kinasungdo iti sapasap a kinasoberanona.​—1/15, panid 11.

◻ Asino “ti tao ti kinakillo” a sarsaritaen ni Pablo idiay 2 Tesalonica 2:3?

Saan nga agsasao ni Pablo maipapan iti maymaysa nga indibidual, ta kunana a daytoy a “tao” nagparangen idi kaaldawan ni Pablo ken agtultuloy agingga nga isut’ dadaelen ni Jehova iti panungpalan daytoy a sistema. Gapuna, “ti tao ti kinakillo” ket simboliko a sasao. Ipakita ti ebidensia nga isut’ bagi dagiti natangsit, ambisioso a klero ti Kakristianuan, a kadagiti naglabas a siglo insaaddat’ bagida kas maysa a linteg.​—2/1, panid 11.

◻ Kasano a maparmek ti kinaagum?

Ti agum kadagiti tattao mabalin laeng a parmeken babaen iti tumutop nga edukasion ken panagsanay, nga addaan kadagiti istrikto a pagalagadan, wenno pagannurotan ti kababalin, a sursuroten. Ti kasta nga edukasion masapul nga aggaput’ gubuayan a mismo a siwayawaya manipud agum. Ti laeng Dios idiay langit ti makaipaay iti daytoy a kita ti edukasion, ket daytat’ masarakan iti naisurat a librona, nga isut’ Santa Biblia.​—2/15, panid 5.

◻ Tapno ti personal a panagadal ti Biblia agbunga iti pannakapatanor ti nadiosan a debosion, aniat’ rebbeng nga iraman ti panagadal?

Ti ranta daytoy a personal a panagadal ket saan a basta panangsaklaw ti pinanid a materiales ket iti kasta punnuen ti isip kadagiti impormasion. Imbes ketdi, no ti maysa a paset ti Saot’ Dios ket mabasa, masapul nga adda met panawen a panangpanunot iti material tapno ikeddeng no aniat’ isursuro dayta maipapan kadagiti kualidad ken daldalan ni Jehova tapno ti estudiante ket agbalin nga ad-adda a kas ken Jehova kadagitoy a bambanag.​—3/1, panid 13.

◻ Apay a ti personal a panagadal ti Biblia rebbeng nga iramanna ti regular a panagbasa iti salaysay ti Ebanghelio ni Jesus?

Ti ulidan ni Jesus tulongannatayo a mangsukay ti nadiosan a debosion. Am-ammo ni Jesus ni Amana a nasaysayaat ngem asinoman, gapuna ad-adda a nasingsinged ti panangtuladna kadagiti pamay-an ken kualidad ni Jehova. Gapuna, isut’ nangted kadatayo ti naan-anay nga ulidan ti nadiosan a debosion. (Juan 1:18; 14:9; Roma 13:14)​—3/1, panid 18.

◻ Iti ilustrasion ni Jesus iti talento, aniat’ kaipapanan ti panangusar ti talento a pagsapul? (Mateo 25:19-23)

Ti panangusar ti talento a pagsapul kaipapananna ti simamatalek a panagtignay kas dagiti embahador ti Dios, nga agar-aramid ti adalan, ken panangted kadagiti naespirituan a kinapudno iti sangakabbalayan ti Dios. (Mateo 24:45; 28:19, 20; 2 Corinto 5:20)​—3/15, panid 13.

◻ Iti ania a tallo nga aspeto a ti Biblia naisalsalumina no idilig kadagiti amin a dadduma a gubuayan ti balakad?

Umuna, ti balakadna ket kanayon a makagunggona. (Salmo 93:5) Maikadua, ti Biblia naibturannan ti suot ti panawen. (Isaias 40:8; 1 Pedro 1:25) Maikatlo, ti nalawa a saklaw ti balakad ti Biblia ket di maartapan. Aniaman a problema wenno desision ti sanguentayo, adda kinasirib iti Biblia a mabalin a makatulong kadatayo.​—4/1, panid 13.

◻ Ania dagiti dua a linea ti ebidensia a mangidemostra a ti Biblia ket Saot’ Dios, saan nga iti tao?

Ti di maartapan a kinasirib ti Biblia ken ti pannakabalinna a mangbalbaliw kadagiti tattao. (Proverbio 2:1, 5, 6; Hebreo 4:12)​—4/1, panid 21.