Gapu ta Nagkararag

IDIAY 1 Tesalonica 5:17, 18, ni apostol Pablo kunana: “Agkararagkayo a di agressat. Iti isuamin agyamankayo. Ta daytoy ti nakem ti Dios ken Kristo Jesus maipapan kadakayo.” Nupay kasta, mariknayo kadi a no maminsan kasla agkedkedkayo a mangipaay iti panagyaman no mangmangankayo iti lugar a publiko, a kas iti maysa a restauran? Maitunos iti pakdaar ni Jesus maibusor iti naparammag a panagkararag, kaawatan a mabalin a tarigagayan ti maysa a liklikan ti panangatrakar iti aglablabes nga atension iti bagina. (Mateo 6:5, 6) Nupay kasta, ti nainsiriban ti pannakaipaayna a kararag mabalin a pataudenna ti anamong dagiti makapaliiw.

Daytoy ti kapadasan ti maysa nga agtutubo a ministro nga agserserbi idiay Brooklyn Bethel, ti sangalubongan a hedkuarter dagiti Saksi ni Jehova. Isut’ mangmangan iti pammigat iti maysa a restauran, nga agpalplano a mapan iti lokal a kongregasionna ket makikuyog iti maysa a grupo a makipaset iti trabaho a panangikaskasaba-ti-Pagarian. Apaman a dimteng ti pammigatna, nagkararag iti kadawyan a wagas. Idi agmulagaten, timmangad ket nakitana ti maysa a babai a waiter a sitatakder a mangmingmingming kenkuana.

“Agkarkararagka, di ngamin?” insaludsodna. Idi simmungbat iti wen, kinunana: “Mabalin a maysaka kadagiti Saksi ni Jehova. Kasta met dagiti dadakkelko. Talaga a diak pulos a nakiraman iti relihionda, ngem ammok a masapul a makiramanak. Nalabit rebbeng a manggun-odak ti suskripsion iti Pagwanawanan ken Agriingkayo! Magun-odak kadi dagita kenka?”

“Ngangnganiak naltotan,” linagip ti kabsat nga agtutubo. Nupay kasta, isut’ nakaipaima kenkuana iti dua a suskripsion ken ti dua a kaudian a magasin ken nakaiyurnos iti panagsarungkar​—gapu ta isut’ nagkararag.